WILLEMSTAD.- Awe a publiká e lista di kandidatonan pa e elekshonnan di Parlamento Europeo. Yu’i Kòrsou Samira Rafaela no ta forma parti mas di e lista aki. Rafaela, lider di delegashon pa D66 den Parlamento Europeo, lo laga polítika for di yüli 2024. El a manda un komunikado di prensa djaweps 21 di desèmber. Den e komunikado e ta splika pa ki motibu e lo no regresá.
Rafaela: “Durante e añanan pasá, mi a dediká mi mes ku gran pashon na benefisio di D66 den Parlamento Europeo. Pa e motibu ei, mi a pone mi mes komo kandidato pa un puesto riba e lista di D66 pa e siguiente elekshonnan Europeo. Despues di deliberashon, mi a disidí ku mi no lo regresá na e lista.”
Manera ta konosí, Samira Rafaela tabatin intenshon pa sigui komo lider di frakshon di D66 den Parlamento Europeo otro aña. Partido, despues di un elekshon interno, a skohe pa Gerben-Jan Gerbrandy pa lider di frakshon di D66 den Parlamento Oropeo. Awor Rafaela ta bisa ku: “Gerben-Jan kier forma su mesun tim. Mi ta deseá dje i su tim tur e éksito. Mi mishon na Europa seguramente ainda no ta kla. Di tur manera, mi ta mira bek ku orguyo na mi trabou i lo dediká mi mes te ora di instalashon di e parlamento nobo na yüli. Mi no ta tuma despedida ainda.”
Den Parlamento Europeo, Rafaela ta mira bèk riba éksitonan manera su lei nobo tokante transparensia di salario i e lei kontra trabou forsá, i su esfuersonan efektivo pa kombatí diskriminashon i rasismo na Europa, manera tambe inkluí e abitantenan di Karibe den asuntunan Europeo. Na 2019, e tabata e promé parlamentario Europeo ku rais Afro-Karibense. Un mishon importante pa dje tabata inkluí paisnan i teritorionan for di ‘ultramar’ den polítika i leinan Europeo. Rafalea den e e último añanan a hasi hopi bishita na Kòrsou i otro islanan Karibense di Reino Hulandes i otro parti di Karibe i Suramérika.
Durante e kuater i mei añanan pasá, Rafaela a kontribuí na logro di e kuota di muhénan Europeo. Komo negosiadó prinsipal, Rafaela a duna forma na e lei nobo tokante transparensia di salario. Ku esaki por kombatí e diferensia di salario entre hòmber i muhé. Esaki ta un lei revolushonario pa tur muhé den Europa.
Den e lunanan benidero, e lo kontinuá ku su trabounan aki.
Blo ta buska problema ku hendenan.