Di dòrna bolo (2cake diva), pa Mosa. Sandy Pieters tabata un di nos invitadonan den programa algun aña pasá. I awe nos tin e atrobe, awor presentando su obra di arte Mosa. Sandy a kuminsá komo yùfrou di skol i awe e ta sinta atrobe den banki di skol ku arte. Nos yu di Kòrsou ta hopi kreativo i esei ta algu den nos sanger i nos tin di bras’é i no lag’é bai, nos tin di krea nos artistanan. Sandy Pieters a bisa ku si mira e artenan di yunan di tera ta krese na Ulanda, ta algu masha bunita.
Aseptá bo mes manera bo ta
El a splika Djasabra ku e trabou di traha bolo a bira muchu pisá pe i a stòp ku esaki i a kuminsá bende kosnan di traha bolo. Su sanger sinembargo a keda kishikí pasobra si bo ta artista ta artista bo ta i traha ku kabes so no tabata bai. Ora e yega kas e tin e tenshon, e ta traha den sikiatria i ora e yega kas e ke algu pa laga bai. El a kuminsá ‘butseer’ na kas pero despues a pensa pa bai un akademia di arte. Asina el a bai un akademia di arte na Delft VAK i einan el a sera konosí ku klei. Sandy a bisa ku e no ke pa su arte disparsé den depósito pero e ke su arte ta visibel pa tur hende. Riba un pregunta ku el a haña di yunan di Kòrsou ku ta hopi den sombra di hòmber i mama, Sandy a disidí ku e tin di hasi algu ku na e persepshon ei. E no ta kere ku e muhé ke ta den sombra di mama i hòmber pero e hende muhé ke wòrdu mirá, aseptá, e hende muhé ta aseptá su mes manera e ta (mayoria). Si wak Mosa e ta simbolisá ku e bala di oro den su man, esei ta e bida ku e tin den su man. Su bida ta oro, su tempu ta oro. I por mira ku mosa tin tur e lòpchinan, chanchan grandi, e bèlnan ta poko bati, pero e ta aseptá su mes manera e ta.
Dikon nos hende muhé ta lubidá ku e ta hopi importante. Bida ta kuminsá den skochi di e hende muhé, asina importante e hende muhé ta. I si ni por aseptá su mes, su kurpa ku tur e lòpchinan, ku chanchan grandi, pai bati, anto e no ta komprondé e ora ei ken e ta. Esei Sandy kier a simbolisá ku Mosa. Mosa ta para pa e muhé yu di Kòrsou di awe. E mucha ku ta lucha i esun ku no gust’é ta su problema. Kada muhé tin un mosa den dje i e punto ta kon ta saka e mosa ei pafó.
E hende muhé den bida
Hopi hende lo bisa ku e Mosa aki no te pasobra kisas e no tin chanchan, pero no ta problema pasobra Mosa ta bin den diferente fase. Loke Sandy a presentá ta e promé. E ta un trilogia i ora e tabata na Kòrsou despues di e di 3, ya e ta pensa pa e di 4. E di kuater mosa aki ta bayendo fòrnu, ta un mosa drumí riba su lomba i por mira e barika grandi, e pechunan habri for di otro, e ta drumi na playa ku e mama den su man pasobra ta su bida. E kos di mas bunita ta ku e mosanan ta besig ku nan mes tempu. Unu ta landa, e otro ta chill kantu di laman, den nan tempu, nan desishon i nan bida. Esaki ta loke Sandy ke trese. I kada turista ku bin Kòrsou por haña un di e Mosanan aki ku su historia. Kada turista ku kumpra un Mosa lo bai kas ku e bon pensamentu di e hende muhé pará den bida.
No skonde
Ku imigrashon a haña ku nos tur na mundu ta bai tuma karakterístikanan di otro. I p’esei ta bon pa hende muhé sa ku rònt mundu nan tur tin un Mosa i no tin mester di skonde e mosa aki. No mester skonde e mosa bou di makiahe, sirugia plástiko, bou di kualke otro kos. E ta un aseptashon ku e hende muhé mester tin di su mes. Aseptá su mes manera e ta.
Mosa ta un Muse
Sandy ta kòrda ku ora e tabata drumí riba kama, ku e obra ya trahá, e tabata ke pa e inspir’é kon e ta bai yam’é. Asina mei mei di mardugá el a lanta su kasá i bis’é Mosa. Mosa ta un muse i e muse aki tin di inspirá nos tur. Na papiamentu nos ta bisa mosa pero e ta un Muse, e ta un inspirashon. E mosanan tin diferente tamaño. Nan a kuminsá chikí i bira un tiki mas grandi. I un biaha mas mustrando riba e hende muhé ku ta krese no solamente den haltura i hanchura pero tambe den e parti di siguransa.
Disponibel
Mosa ta disponibel na diferente punto sentral. Sandy a bisa ku na ofisina di turismo ya tin 2 mosa kaba. I for di siman pasá e ta optenibel na galeria na De Eden Mall Stichting Bijzonder Vrouwen. El a skohe nan pasobra nan ta chikí i pa Sandy tur chikí tin di krese. Despues di einan Mosa lo tei tur kaminda, pasobra ta su meta esei ta.
Mosa ta duna kara
Lo bin un mosa chikí den forma di un yabero. Esei lo ta e kara di mosa i e lo yama tambe Mosa ta duna kara. Tur e obranan di mosa, niun por mira nan kara. E yabero si lo ta e kara di Mosa i por mira e kara di Mosa. E yabero aki segun Sandy e lo presentá otro aña.
Krea bo Mosa
Loke a hala nos atenshon ta ku e Mosa ta bin den dos sistema, un ta esun ku Sandy mes ta pinta òf e muchanan ménos abilitá ku lo yud’é pinta. Pero tambe e ta bin den un kaha kompletamente blanku ku su bala koló di oro i huntu kuné den e kaha lo haña fèrf i kuashi pa asina e persona mes por dun’é e koló ku e ke. Tambe huntu kuné un palu di sensia ku por hinka den e bala koló di oro ku tin un buraku spesial pa esaki. Di e forma aki tambe un mama por sinta ku su yu i nan por pint’é huntu i inspirá e yu pa e krea su mosa.
Ora bida poko pisá, pone bo Mosa kaminda bo ta mir’é i bo ta kòrda ken bo ta i unda bo ta!
