WILLEMSTAD.- Selekshon di futbòl di Kòrsou ayera mainta na Alanya, Turkia, a saka un empate 2-2 kontra di e ekipo turko Alanyaspor. Tabata e di dos wega di training di Kòrsou bou direkshon di e veterano entrenadó hulandes Dick Advocaat, di kende por bisa ku el a start riba bon pia pa loke ta trata e dos weganan amistoso ku sigur a yuda pa dun’é un bista di kiko e tin den kas.
Alanyaspor ta ekipo di “Super Lig” dje siudat turko Alanya. E ekipo aktualmente ta na di dies puesto den nan kampionato, ku ta konta ku binti ekipo den e divishon prinsipal. Por sierto nan a gana nan delaster tres partidonan promé ku e wega amistoso kontra di Kòrsou.
Kòrsou den e partido di ayera mainta a bai dilanti 1-0 ku gol di Jearl Margaritha na di 28 minüt. Despues ku e turkonan a empatá, Leandro Bacuna na di 53 minüt di wega ta bolbe manda Kòrsou ariba, 2-1. Pero finalmente e ekipo di kas ta bin skor e gol di empate, ku kua e partido ta finalisá.
Pa Kòrsou sin duda un bon siman pa por a trese e selekshon huntu, ku viktoria di 1-0 riba Hull City britániko i ayera e empate na dos gol.
E siguiente kompromiso di Kòrsou awor ta den kuadro di CONCACAF, na momento ku dia 4 di yüni enfrentá Barbados aki na kas i tres dia despues lo ta komo ekipo di bishita na Aruba.
