WILLEMSTAD.- Durante e periodo di 3 òktober pa 9 òktober 2022, polis a registrá i a analisá e siguiente aktividatnan kriminal. Por tuma nota ku e sifranan a baha poko, pero kiebro den kas ta sigui hala atenshon.
Atrako
Pa loke ta trata kasonan di atrako, den e periodo ariba menshoná tabatin 3 kaso ku a keda registrá. Esakinan a tuma lugá den oranan di mardugá pa mainta trempan den e barionan di Seru Fortunaweg, Juan Domingu bij Mahuma i F.D. Rooseveltweg.
Ladronisia di vehíkulo
Tambe malechornan a hòrta 1 vehíkulo i intentá na hòrta 2. E kasonan a tuma lugá entre mainta pa anochi den e área di Waaigat, Kaya Homan, Caracasbaaiweg. E marka i modèl di e vehíkulonan tabata Mitsubishi L 300, Mitsubishi Lancer i Kia Picanto.
Kiebro den kas
Kiebro den kas ta esun mas haltu e siman aki. A registrá 12 kaso. Esakinan a tuma lugá for di 5 or di mardugá te ku anochi 12 or, pues durante vários orario di dia.
E sitionan tabata Mahuma Kaya O, Kaya Felpa G, Mangoweg, Mirla Plateweg, La Quinta Villa Resort, Troepiaalweg, Helfrichdorp, Kaya Damasco, Ronde Klip Weg, Kaya Gamay, Caroni Weg i Kaya Seru Bayan.
Malechornan a kometé e kasonan di ladronisia dor di kibra porta i bentana den mayoria kaso.
Kiebro den negoshi
Den e periodo ariba menshoná tabatin 6 kaso di kiebro den negoshi ku a keda registrá. Nan a tuma lugá entre 3 or di mardugá pa nueb’or di mainta i tambe entre 3 or i 5 or di atardi den área di Piscaderaweg, Seru Loraweg, St. Michielsweg, F.D. Rooseveltewg, Kaya Charles Maduro, Kaya Jombi Mensing.
Den mayoria kaso malechornan a kibra porta i slòt.
Kiebro den/na outo
Tambe tabatin 5 kaso di kiebro den i na outo ku a keda registrá den e periodo ariba menshoná.
Esakinan a tuma lugá entre 8 or di mainta pa 12 or di mèrdia i tambe entre 7 or pa 12 or di anochi den área di Piscaderabaai, Caracasbaai 2x, Kaya Koruna, Kaya Yanchi Boskaljon.
Violensia relashonal
Durante e siman ariba menshoná tabatin 9 kaso di violensia relashonal ku a keda registrá. Esakinan a tuma lugá entre 4 or di atardi pa 11 or di anochi i tambe entre 3 or di mardugá pa 8 or di mainta den área di Seru Fortuna, Rif bij Otrobanda, Punda, Maria Maal, Dominguito, Mari Pampoen, Koraal Specht, Jan Thiel i Cas Cora.
