WILLEMSTAD.-Minister Javier Silvania ta proponé Betesda pa habri porta i duna kuido na pashèntnan ku aktualmente ta den hospital CMC, pero defakto no mester ta den un hospital pero mas bien den un instituto di kuido manera Betesda. Minister Silvania ta splika ku di e forma aki Betesda ta yuda generá fondo pa kubri su gastunan e.o di indexering na su personal.
Manera EXTRA a informa na algun okashon Betesda a reuní ku e mandatario i a hasi petishon pa haña sosten di likides, tarifanan nobo konforme konteo pa 2024 i tambe a pidi pa saneá e debe di belasting di Betesda. Den su kontesta na Betesda e minister a bisa ku e informashon ku e instituto a presentá no ta duna sufisiente base pa bai di akuerdo ku e petishonnan hasí.
E mandatario ta kere ku Betesda lo por ofresé kamanan bashí (40) na CMC na un preis redusí. Kon ku bai bin e tarifanan di Betesda ta mas abou ku esnan di CMC. Den hospital tin basta hende ku mester haña kuido pero no nesesariamente di un hospital, pero e hendenan ei no por bai kas. Komo solushon minister Silvania ta kere ku Betesda lo por ofresé kamanan na un preis redusí i asina generá entrada.
Mester palabra ku SVB riba un tarifa. Minister Silvania ta spera di por tende ku Betesda, promé ku 1 desèmber, si por logra yega na un akuerdo.
