BRUSSEL, BELGIKA (AFP).- Union Europeo (UE) ta disponé di informashon riba mas di 1.000 morto den poko mas di dos dia na Darfur, wèst di Sudan, den loke ta parse di ta un kampaña di “limpiesa étniko”.
“E último atrosidatnan ta parse di ta forma parti di un kampaña amplio di limpiesa étniko ku ta na enkargo di paramilitarnan di Forsa di Apoyo Rápido, ku e meta pa eradiká e tribu no árabe Masalit for di parti wèst di Darfur”, segun e hefe di diplomasia europeo, Josep Borrell. El a agregá ku e atakenan a tuma lugá” despues di un ola di violensia na gran eskala” den luna di yüni.
“Testigunan a informá ku mas di 1.000 miembro dje tribu Masalit a keda matá na Ardamata, parti wèst di Darfur”, segun Union Europeo.
E agensia di ONU pa refugiadonan (ACNUR) resientemente a informá ku “mas di 800 persona a keda matá pa gruponan armá den Ardamata”.
Union Europeo “ta trahando ku Korte Penal Internashonal pa establesé i dokumentá e violashonnan di derechinan humano, ku e meta pa garantisá ku e outornan intelektual lo paga pa nan krímen”, segun ta bisa den un komunikado.
