WILLEMSTAD.- Stichting Bírgen di Rosario a ekspresá nan situashon den parlamento ora a papia enkuanto kuido pa hende grandi sikogeriátriko.
Di akuerdo ku sra. Indra Rossum-Lucasius direktor di Stichting Bírgen di Rosario kuido pa hende grandi i ku demensia òf alzheimer dia pa dia ta bira mas pisá i kompliká. Na 2023 nan tabatin 109 atmishon di kua 63 a bini di hòspital. Nan a drenta hopi malu. Den 2024, nan tabatin 29 atmishon di kua 19 ta bin di hòspital. Esaki ta rekerí mas material pa traha kuné entre otro ròlstul, badstul loke ku e fundashon no tin.
Mas aktividat tin di tuma lugá por ehèmpel hiba kliente spesialista òf hòspital. Pa un siman e fundashon ta hasi 5 pa 8 kareda pa spesialista òf hòspital pa dia.
Medidanan di kompania di seguro ta afektá e kuido; no ta permití kompanianan di transporte hiba kliente den ròlstul pa spesialista i hòspital. SVB ke a implementá e paro di duna vitamina i mineral via di resèpt pa hende grandi. Esaki por nifiká ku 1 di 3 hende grandi no ta haña esaki, kual ta nesesario pa nan kalidat di bida. E pregunta ta ken ta bai paga esaki. Minister Silvania a pone e medida aki “on hold” pa un temporada. Inspekshon ta bisa ku mester tin spesialista di hende grandi den servisio pa atendé ku e kuido di hende grandi, ya ku e fundashon ta un instituto serio i grandi i ku kuido kompliká. Mester paga e spesialista, kual ta mas tantu gastu. Mester paga dòkternan di kas di forma separá pa atendé ku warda 24/7 pa e klientenan di e fundashon. Paso ainda nan no a haña posibilidat di partisipá den HAP ku no ta kore warda pa tur instituto di kuido.
Mas aleu e direktor a bisa ku e fundashon tin reto ku no ta haña personal di kuido fásil riba merkado. Den 2022 a tuma despedida di 37 miembro di personal, nan ta bai Bonaire, Aruba òf Hulanda. Den 2023 a tuma despedida di 25 miembro di personal di kua 19 ta personal ku a tuma retiro. Na a bai pa un mihó oportunidat. Salarionan ta relativamente abou promedio di 2800 florin bruto pa luna. Tin un CAO ku a firma, i kasi no por kumpli kuné i ta trese reto finansiero kuné.
E fundashon ta haña supsidio di parti SOAW i SVB. SOAW su tarifa ta data di 2012 kual ta 119 florin pa kliente pa dia. Entre tantu a haña diferente aporte i awor e ta 100 florin pa kliente pa dia.
E fundashon a eksperensiá un bahada di 20% den 6 aña di su supsidio via di SOAW di 10.2 mion pa 8.1 mion. Esaki tanten e kuido a bira mas pisá, tur kama ta yen i kosto di bida a subi. SVB su tarifanan tambe ta data for di 2012. No a indeksá nan mas.
Interesante ta ku SVB ta finansiá 4 instansia di kuido kual ta Betèsda, Hamied, Kas Hugenholtz i Bírgen di Rosario. Tur kuater tin mesun pèrmit. Pero ta di SVB, Betèsda so ta risibí komo tarifa 177 florin pa kliente pa dia i demas 3 instansia ta haña 146 florin pa kliente pa dia.
Tur provedor ta subiendo nan tarifanan, miéntras debenan na Ontvanger ta oumentando. Nan ta gradesido di a risibí supsidio èkstra aña pasá di 970 mil florin pa invershon, pero e no ta trese solushon struktural, sra. Rossen-Lucasius a terminá bisando
