Otro siman dia 15 di desèmber Instituto Buena Bista lo eksponé obra di e studiantenan. Tambe lo tin eksposishon di obranan trahá di bleki ku e studiantenan tambe a traha bou di guia di Tim Breukers. Tim di su parti a splika ku nan a hasi tayer di bleki ku e studiantenan ku a kuminsá e siman aki i e tambe tin di keda kla pa laga mustra e bishitante kiko e studiante a traha. Segun Tim, nan a kòrta, solder, i a yega na diferente figura trahá di bleki.
Téknika i material
Tim Breukers ta na Kòrsou aktualmente komo artista residensiá na IBB. E ta traha komo dosente na Koninklijke Academie na Ulanda pa mas ku 10 aña kaba, den arte. Tim ta traha prinsipalmente ku klei den tur forma i tamaño. Nos ta papia di obranan di mas di 4 meter haltu pero tambe e tin obranan chikí. Tabata interesante pa nos a sa di Tim kiko ta mas fásil òf mas difísil, obranan di klei chikí òf grandi. Pa Tim no por papia di kua ta mas difísil esta grandi òf chikí. Komo artista Tim ta hasi hopi ku material i téknikanan i pa esei bo tin di hasi esfuerso. Bo tin di komprondé i esei e ta laga mira den un sorto di historia di loke ta sosodé na momentu di presentá su obranan. Ta e dos kosnan ei e ta pone huntu i asina e ta yega na su obranan. Ku esaki el a enfatisá ku no ta solamente un obra di material pero pe, e reto di mas grandi ta e material i téknika huntu ta yega na un historia.
Un desafio
Na Kòrsou ta promé bes ku Tim ta traha ku bleki. E ta un desafio pe i e ta hañ’é sumamente interesante. I por spera tur sorto di obra, diferente diseño. Entre otro el a traha monumento, el a traha asta wimpers di bleki. Grandura ta hunga un ròl importante trahando ku bleki tambe. Hopi bia e tin di aber ku humor serka Tim. El a mustra por ehèmpel un pòpchi ku el a traha bou di lusnan di tráfiko pero si wak bon e ta poko grandi. I einan ta sigui e historia su tras.
Detaye
Esaki ta Tim su promé bishita na Kòrsou. Loke mas a sorprendé i impreshon’é ta e bishita serka sr. Palm (blekero) ku tin 99 aña, e generashon di mas bieu, kende ta traha su obranan ku asina tantu detaye. Por a sintié serka Palm kuantu plaser e tin den su trabou. Palm ta traha ku bleki i Tim a ripará ku e atenshon tabata hopi profundo.
Plaser den trabou
Titel na su turno a bisa ku loke e gusta di Tim ta su trabou, e ta hunga ku e kosnan i esei ta importante pa e trese na e studiantenan. E studiantenan hopi bia ta den e tayer i nan por strès pasobra ta trabou e ta. Nan ke hal na portafolio i ke bai studia. Pero pa Tim e ta plaser den loke e ta hasiendo. Ora Titel wak e trabou di Tim, e ta wak Kòrsou asina fuerte i e ta anhelá pa tur artista ku bin Kòrsou tambe por eksperensi’é asina. E opservashonnan di Tim ta diferente i ta un plaser sinta papia ku Tim i tende kon e ta papia di Kòrsou i ku awor e por asta eksponé den su obranan.
Pasa dushi
Pa Tim arte no ta algu strak. El a bisa nos ku e por tin strès tin bia pero ta e ke pa e studiante pasa dushi. Sea e ta bira famoso òf no, riku òf no, ta importante ora bo ta besig bo mester gusta i tin plaser den loke bo ta hasi. Tin diferente plaser ora ta papia di trabou. Por ehèmpel el a traha algu ku tin di aber ku refineria ku no ta algu plasentero pero el a kambi’é den un forma ku tòg ta poko plasentero. No ta solamente hari pero obra ku ta duna tristesa tambe.
Balorá e studiante i sostené
Titel di su parti a konta nos ku e eksposishon di dia 15 ta un di e kosnan di mas leuk di henter aña eskolar. Ta e promé eksposishon di e aña eskolar aki. E studiantenan ku a kuminsá e aña aki i esnan ku tabat’ei kaba lo mustra tur loke nan a traha ariba for di sèptèmber ora a kuminsá. Por ehèmpel tin e tayer di Tim, tin e tayer di Elvis ku tabata un alumno di IBB i awor ta duna lès einan. Titel i Nohelia tambe tabata alumno di IBB i nan a duna un tayer di game ku no ta digital. Otro siman e hende por bin i hunga e weganan ku e studiantenan a krea. E ta spera di mira e públiko pa eksperensia kiko e hóbennan a traha. I no ta kuartel ta bai haña pero ta weganan pa tur edat i algu ku un hende no por imaginá su mes. Porta ta habri for di mitar di 7 anochi i ta kuminsá 7 or i ta dura te 9 or. I tur kos ta indiká ku e eksposishon por keda atmirá te promé ku Pasku for di 10 or di mainta te 6 or di atardi.
Kos por ta otro
Teniendo na kuenta e balor i atenshon ku nos hendenan ta pone atenshon na e artista, Titel ta haña masha interesante kon otro e kos por ta na Kòrsou. Si wak e apertura di Tirso Martha su eksposishon na museo di Kòrsou, áwaseru a kai riba e anochi, i tòg tabata yen yen. Pero meskos por tin un evento ku djis algun hende. Tin di komprondé ku meskos ku e hende ta gusta tende su artista faborito toka na radio meskos ku e hóbennan studiante ke pa hende bin wak nan eksposishon. E hóben ke sinti ku e ta keda sostené. IBB tin mas di 100 studiante ku a gradua den nan 16 aña di eksistensia i tin mas di 50 studiante aktualmente. Tin hóbennan kla pa bin traha den kultura na Kòrsou pero si no duna nan e sosten nan ta pensa ku e no ta nesesario.
Di chikí te grandi
Tim a splika ku e ta traha hopi ku kolazje i no sa presis kon e obra ta bira. E por traha dos òf tres obra ku a bira un totalidat. Ta awor nan ta besig ku e blekinan i pa asina por eksponé otro siman. Ta obranan ku no ta mira fásilmente. Tin obra for di chikí te grandi. Tambe tin instrumènt di ántes trahá di bleki.
