WILLEMSTAD.- E Hunta di Supervishon di kas di kuido Betèsda den reunion ku representante di trahadónan a ta keda para riba nan punto ku mester bai mediadó intervení den e situashon ku a surgi na e kas di kuido. E sindikato CBV a bisa ku nan no ta aseptá esaki, ku nan ta keda den akshon i ta na e Hunta di Supervishon pa hiba e sindikato korte pa eksigí e trahadónan pa bai trahá atrobe.
CBV ta aseptá mediashon solamente si e Hunta di Supervishon tuma desishon pa suspendé direktor Natasha Rog. Segun presidente di CBV, Annaliza Suares-Mathilda trahadónan den nan mayoria a indiká ku nan no ke traha mas ku e direktor. Tambe e sindikato ta di opinion ku Rog no por manehá e instituto manera debe ser pasobra e tin muchu otro kos ta hasi ku ta envolví trabou pa un laboratorio lokal i tambe su mes ofisina.
E Hunta di Supervishon a bisa ku si e sindikato ke pa suspendé Rog nan por bai korte i pidi korte pa hasi esaki. A mustra ku mester sigui lei i si un persona ku interes (“belanghebbende”) tin problema ku un gerente (“bestuurder”) e ta pidi korte pa poné un banda, Hunta di Supervishon no ta bai hasi esaki.
Minister di salubridat ku via telefòn tambe tabata sigui e reunion Silvania a bisa e Hunta di Supervishon pa asumí nan responsabilidat pa logra pas laboral i no tuma desishon pa skùif pa futuro e situashon pa futuro. E Hunta di Supervishon a pidi pa suspendé e reunion pa nan por deliberá riba e eksigensia di CBV i petishon di minister Silvania.
Suares-Mathilda ta di opinion ku mirando ku falta 6 luna mas pa tuma desishon si ta prolongá su kontrato ta mihó tuma un desishon for di awor pa trese un kambio den maneho di Betèsda. E ta mustra ku e direktor mes den un kaso di un trahadó ku el a suspendé ta bisa ku tin 6 kolega ku no ke traha kuné mas i pa e motibu aki mester terminá su kontrato.
Den e mesun analogia aki Suares-Mathilda ta kere ku no por sigui mas ku Rog pasobra mayoria di 75 trahadó no ke traha kuné mas. Segun e presidente di CBV Rog lo no keda desampará mirando su otro trabounan.
Silvania a bisa ku e ta bon na haltura den betèsda pasobra e tin kontakto tur dia direkto ku trahadónan. E ta kuestioná ku el a pone sèn èkstra disponibel pa Betèsda kumpra material nobo pero te ainda e material nobo no a bini.
“Ta risibiendo demasiado señal ku kosnan no ta bayendo bon i tin kosnan straño ta pasando”, Silvania ta bisa. “E kos aki ta sinta na maneho i maneho finansiero.” Segun e minister tur esaki miéntras ku gerensia di betèsda ta gana un salario astronómiko.
E Hunta di supervishon a indiká ku nan no ta presente tur dia den e instituto i awor ta tende hopi opinion personal riba hopi asuntu ku ta tumando lugá. I a proponé pa laga pidi un investigashon pasobra e Hunta di Supervishon tambe tin preguntanan riba sierto proyekto manera oferta pa kompra di un generator ku a laga nan ku pregunta.
Di otro banda a mustra ku na 2015/2016 tabatin un rapòrt devastador riba betèsda i a trese kambio den maneho pa renobá e kuido, sin ku gobièrnu a ahustá supsidio pa e instituto. Ta pa e motibu aki tambe
Suares-Mathilda a interumpí e Hunta di Supervishon i para riba su eksigensia pa suspendé e direktor pa trese pas i trankilidat. ‘Nos no a bini pa generator òf tres oferta”, Suares-Mathilda ta opiná
AKSHON
Trahadónan di kas di kuido Betèsda a drenta akshon for di awe mainta tempran. E trahadónan ta bisa ku nan ta disgustá ku a manera kon kosnan ta kana na e instituto i no ke sigui traha bou di maneho di e aktual direktor.
Pa algun dia kaba tin bastante inkietut rondó di e instituto su situashon finansiero. Pago di salario i kompra di ekiponan nobo ku Betèsda a risibí supsidio èkstra pe ta algun di e puntonan ku ta bin dilanti.
Suares-Mathilda a akudí na Betèsda i a reklamá ku niun hende di gerensia a sali pa papia ku e trahadónan. Tambe el a reklamá ku e direktor, Natasha Rog ta den eksterior riba un biahe di trabou aparentemente pa wak ekipo pa kushina miéntras ku situashon den Betèsda henter e siman aki ta bou di tenshon.
Suares-Mathilda via telefòn a papia ku minister Silvania ku a partisipá na e trahadónan den akshon ku el a pidi Hunta di Supervishon presentá na Betèsda i pa papia ku e trahadónan i sinta i atendé e situashon pa pas laboral. Tambe e minister a pidi Hunta di Supervishon pa hasi investigashon riba maneho di Betèsda.
