WASHINGTON, AP.- Presidente merikano Donald Trump i su homólogo surkoreano a papia via telefòn djaluna pa promé biaha desde ku Norkorea a anunsiá un otro ensayo nuklear.
Ambos lider ta di opinion ku e ensayo nobo aki ta un provokashon grave i “sin presedente”.
E kombersashon telefóniko a tuma lugá na momentu ku Konseho di Seguridat di Nashon Uni a realisá su segundo reunion di emergensia riba e tema den un siman. E sekretario di Defensa di Merka, Jim Mattis, a bisa djadumingu ku Merka lo réplika kualkier menasa di Norkorea ku un “kontesta militar masivo”.
Trump a ekspresá kada biaha mas frustrashon ku e kontesta di otro paisnan kontra e provokashonnan norkoreano. Fin di siman, e mandatario a menasá di suspendé komersio ku tur pais ku tin negoshi ku Pyongyang i a kritiká Sur Korea pa su intentonan pa “aserká” Pyongyang.
Trump a konsiderá pa retirá e tratado di komersio liber ku Surkorea, na momentu di tenshon ku rival komun.
