WILLEMSTAD.- Guardian Group Fatum ta trese e di 38 edishon di My Guardian Group Walk & Run aki na Kòrsou. Esaki lo tuma lugá djadumingu 29 di òktober. E tema di e aña aki lo ta “Health is Wealth”. E aña aki parti di e fondonan rekoudá ku e evento aki, lo ta dediká pa sostené e konstrukshon di e edifisio nobo di Krus Kòrá. Esaki pa asina por yuda nan pa por sigui ku nan esfuersonan humanitario vital.
Partisipantenan por skohe pa kana òf kore e ruta di 10 km, den forma kompetitivo òf rekreashonal.
E kaminata ta kuminsá 06:30 AM na ofisina di Guardian Group Fatum na Cas Coraweg #2 i kulminá na Parasasa Beach. Koredornan kompetitivo lo risibí un number (BIB) ku outomátikamente lo registrá nan tempu di kareda di forma digital. Riba nivel kompetitivo lo tin premionan den diferente kategoria di edat i e ganadornan apsoluto (maskulino i femenino) lo gana partisipashon outomátiko na e My Guardian Group Walk & Run 2024 na Boneiru.
Servisio i organisashonnan manera Kuerpo Polisial Kòrsou, Krus Kòrá mes, VKC, Padvinderij, Forensys, Bikers Kòrsou, tim di futbòl SUBT, tim di vòlibòl Stakamahachi, tim di beisbòl Wild Cats i e ayudante i boluntarionan di Guardian Group lo sòru pa e evento ta bon kordiná.
Partisipashon na My Guardian Group Walk & Run ta kosta 15 florin pa persona i registrashon online ta nesesario. Pago i entrega di T-shirt ta posibel for di djárason, 25 di òktober te ku djabièrnè, 27 di òktober 2023, entre 17:00 or i 20:00 or na ofisina di Guardian Group Fatum.
“Health is Wealth”,
Mas aleu, enfokando riba e tema di e aña aki, “Health is Wealth”, Guardian Group Fatum a uni forsa i kolaborá ku studiantenan di e fakultat di medisina di St. Martinus University. Durante e dianan di registrashon i pago e studiantenan lo bai ofresé un chekeo di salú grátis na esnan presente ku ta deseá esaki. Tambe e bùs di salú di Lab de Med lo ta presente pa kondusí tèst di sanger pa midi suku di forma rápido.
