BRUSELAS, BELGIKA, AFP.- Komishon Europeo a anunsiá djaluna ku e gigante teknológiko Apple, ta abusando di su posishon dominante ku e servisio di pago elektróniko Apple Pay.
E Komishon, e brasa ehekutivo di Union Europeo, a señalá ku e empresa “a restringí kompetensia riba merkado di ‘wallet’ digital” den su telefònnan selular, i ku esaki ta ilegal bou di normanan europeo.
Komisario di Kompetishon Europeo, Margrethe Vestager a bisa den Bruselas ku Apple ta “restringí terser partinan di haña akseso na teknologianan esensial ku ta nesesario pa desaroyá e e-wallet” riba aparatonan di Apple.
Pa e motibu aki “nos konklushon preliminar ta ku Apple a restringí kompetensia, pa su propio benefisio, kual ta Apple Pay”. E aktitut aki ta “abusu di un posishon dominante, kual ta ilegal bou di nos reglanan”, asina Vestager a bisa.
E núkleo di e kontroversia ta e aparato NFC, kual ta e base pa hasi pagonan ku telefònnan selular. Solamente Apple Pay tin akseso na e chip di NFC, i un kompania ku ke desaroyá un aplikashon ku ta usa NFC mester paga Apple.
Segun Komishon Europeo, Apple no ta permití òf ta limitá akseso na e chip NFC.
