ZAPORIYIA, UKRANIA, AFP.- Outoridatnan ukraniano ke evakuá mas sivil di siudat di Mariupol djaluna, despues ku nan a pasa vários siman pegá entre atakenan intenso di Rusia, den un edifisio di heru na sùitost di Ukrania.
Sentenáres di persona a wòrdu evakuá fin di siman di e planta enorme Azovstal, den region di Donbas, kual ta kasi kompletamente bou di kontròl di Rusia.
Dos SUV di Nashonnan Uní i otro vehíkulonan No Gubernamental, i tambe periodistanan tabata wardando riba nan serka di Zaporizhia, un siudat ku ta 200 kilometer na nortwèst i kual ainda ta bou di kontròl di Ukrania. Akinan tin un sentro di refugio, segun indikashon di AFP.
E evakuashonnan a kuminsá djasabra, ku kordinashon di Ukrania, Rusia i Komité Internashonal di Krus Kora, i a marka e promé evakuashon di mas di “100 sivil” den mas di dos luna ku a kaptura e siudat, segun indikashon di presidente Volodymyr Zelenskyy.
E vise promé minister di Ukrania, Iryna Vereshchuk, a deklará ku “ainda tin sentenáres di sivil ku ainda ta pegá”. E evakuashon nobo mester a kuminsá den oranan trempan di djaluna, pero e bùsnan “no a yega e punto di reunion” na ora. Esakinan a yega despues di mèrdia, segun indikashon di alkalde di Mariupol riba Telegram.
