DEN HAAG, ULANDA, AFP.- E gobièrnu di Ulanda a anunsiá plannan nobo pa restrikshonnan di eksportashon di teknologia pa traha chep di kòmpiuter, despues di preshon di Merka pa restringí akseso di China na e teknologia.
Ulanda, kual ta Europa su fabrikante prinsipal di mashinnan ku ta yuda manufakturá “microchip”, a keda obligá pa imponé restrikshonnan similar na esnan ku Washington a anunsiá aña pasá.
“Gobièrnu a yega na e konklushon ku ta nesesario pa seguridat internashonal i nashonal pa amplia e kontròl di eksportashon eksistente di ekiponan di produkshon di un ‘semiconductor’ spesífiko”, segun indikashon di e minister di Komersio Eksterior di Ulanda, Liesje Schreinemacher, den un karta na Parlamento.
E anunsio a sosodé ménos ku dos luna despues ku promé minister Mark Rutte a bishita presidente Joe Biden na Kas Blanku, kaminda nan a papia tokante e tema aki.
E restrikshonnan lo afektá ASML, ku sede na Ulanda, e empresa di teknologia di semikonduktor di mas grandi na Europa.
