WILLEMSTAD.-Sekretario di estado Alexandra van Huffelen den un karta dirigí na Minister di Finansa Javier Silvania ta duna sosten pa implementashon di medidanan di mehorashon di e sistema di belasting na Kòrsou. Van Huffelen ta hasi apelashon na e titular di finansa lokal pa inkorporá e medidanan, ku ta paresé den e komunikado di prensa di 30mart último, den e implementashon di ‘Landenpakket’ mas lihé posibel. E ta puntra si lo por inkorporá e medidanan aki den e agènda di ehekushon ku ta kore di sèptèmber pa desèmber 2024.
Manera ta konosí minister Silvania a laga SOAB hasi algun investigashon riba funshonamentu di e instituto Ontvanger. E rapòrtnan aki a mustra riba puntonan defisiente i tambe riba posibel kasonan kaminda ta duna privilegio riba otronan. Sekretario di estado Van Huffelen ta bisa ku el a tuma nota di e rapòrtnan di SOAB ku entre otro a menshoná ku ta duna voorschot na sierto hendenan asta promé ku inspektor di belasting saka aanslag ta kiko e persona debe. Tambe el a tuma nota di e komunikado firma pa minister Cooper den kua a indiká kon gobièrnu ta plania pa atendé ku loke a konstatá.
Na opinion di sra. Van Huffelen den kuadro di ‘Landenpakket’ Kòrsou i Hulanda ta traha huntu pa logra ahustenan. Esakinan mester kondusí na mihó repartishon di entrada riba e isla aki i esaki mester keda realisá pa un servisio di impuesto efisiente i moderno. Van Huffelen ta kontentu ku e rapòrtnan aki a bira publiko.
Puntonan ku e rapòrtnan ta señalá mester keda implementá hopi lihé manera e.o traha un plan di mehorashon inmediatamente i implementá esaki pa mitigá e riesgonan ku SOAB a señalá. Tambe ku SOAB lo evaluá e plan i raportá. Mester paga bek tur voorschot ku no a drai bek ainda. SOAB mester kontinuá ku kontrol interno, mester bini un sentro di reklamo pa klientenan i vários mas.
Van Huffelen ta indiká ku lo no por traha na un sistema di impuesto fuerte i hustu di no tin e garantia ku Ontvanger ta traha transparente i hustu. Komunidat di Kòrsou meresé ku ta hasi e korekshonnan menshoná. Mas detaye den edishon di EXTRA.
