KIEV, UKRANIA, AFP.- Un “atake masivo” ruso a gòlpia instalashonnan di koriente i awa den vários region na Ukrania, segun indikashon di e gobièrnu ukraniano, lagando 80% di usuarionan den e kapital, Kiev, sin awa i “sentenáres di bario” den shete region den e pais sin koriente.
Ehérsito a añadí riba Telgram ku a lansa mas ku 50 misil kontra infrastrukturanan klave den e pais i ku 44 di na a keda destruí den laira, dos dia despues ku Moscow a akusá Kiev di atake su flota den Black sea.
Presidente ukraniano Volodymyr Zelensky a bisa den su diskurso diario ku el a kombersá ku e kansier aleman, Olaf Scholz, gradisiendo e pa e armanan di defensa antiaéreo entregá na Ukrania. “Nos mester konstruí un eskudo antiaéreo riba Ukrania”, asina Zelensky a Tweet.
Den Kiev, e kapital ukraniano, por e skucha por lo ménos sinku eksploshon, segun indikashon di periodistanan di AFP.
E alkalde di e siudat a bisa riba Telegram ku 80% di usuarionan no tin awa i 350.000 kas no tin koriente.
Segun e minister di Eksterior ukraniano, Dmytro Kuleba, por lo ménos diesdos pais a komprometé pa duna generator i otro ekiponan pa aliviá e falta di koriente.
