Xaverianen (60 aña); muchu mas ku un tim di vòlibòl

Eric Ogenia presidente Xaverianen

Michael Clarissa (Moldo)

Renato Boerleider (Nato)

Nos ta riba kaminda pa selebrashon 60 aña Xaverianen. I pa kana yega einan Eric Ogenia presidente di Xaverianen, Michael “Moldo” Clarissa i Renato “Nato” Boerleider ta trese un tiki mas serka den kada un di nos su kas, e historia di e klup Xaverianen, muchu mas ku un tim di vòlibòl. Xaverianen a nase 15 di febrüari 1964 pero e aña aki na luna di sèptèmber lo tin un ban Topa pa henter e famia di Xaverianen.

 

60 aña Xaverianen

Eric Ogenia tei for di nasementu di Xaverianen. Na 1964 a bin bruder Henri Kokken for di Ulanda i a kuminsá siña e muchanan toka Flùit i ‘mondharmonica’. Na aprel el a kuminsá ku Kor i einan Eric tambe a djòin, nan tabata kanta den misa, despues hunga komedia. Eric su stèm tabata fini i e tabata solista. Despues ku su stèm a madurá un tiki, Eric a bai toka trompèt i musikalmente el a hasi diferente kos. Tur esaki el a siña den Xaverianen. Pa siman nan tabata trein dos tres te kuater bia a siman. Den Xaverianen nan a siña hopi kos. Xaverianen a bin di  St Xaverius College ku tabata skol di mucha hòmber, Nan tabata keiru hopi, bai kamper, bai landa i hopi mas. Tabata parti e muchanan den grupo i nan mester a sòru pa nan kuminda. Tur kos ta segun programa i no ta haña e muchanan sintá ta hasi nada, Tur dia tin kos di hasi i anochi ta hunga wega, Einan segun Eric nan a krese. Un di e promé kosnan ku Eric ta kòrda ta ku mester a paga kontribushon dies plaka pa siman. I asta e tempu ei tabatin retraso i mester a pasa kobra kas pa kas. Despues a kuminsá ku e grupo di mucha muhé di Stella Maris. E promé grupo di aguinaldo tabata yama Marixavios. Te ainda segun Eric nan tin bon kontakto i  a pasa masha dushi tempu. Eric ta kòrda ku nan huntu ku e mucha muhénan a bai kamper huntu na Landhuis Pannekoek. Tur kos ku desensia i regla. Tabatin un grupo di sirbidó di misa ku Bruder tabata dirigí i nan a bira e promé tim di vòlibòl di Xaverianen. I despues e mucha muhénan tambe a kuminsá ku vòli. Esaki pasobra den pouze sea ta spèl òf vòlibòl. Esei tabata e promé timnan eksitoso.

E base

Despues di esaki Eric a bai Ulanda bai studia na 1972 i na 1980 el a regresá Kòrsou. Na Kòrsou el a djòin e grupo bèk i einan a topa Michael i Renato. E ta kòrda ku na 1980 i 1981 e tim a sali kampeon hubenil. E di tres aña el a bisa nan ku no por bira e subi nan di nivel. Eric su ruman hòmber mas chikí a bai Ulanda i einan a hunga vòli, Einan su coach tabata Bert ku despues a bin fakansi Kòrsou. Nan a probechá laga Bert trein e hóbennan i duna klínika. I esei tabata e base ku a pone ku Xaverianen a krese bai laga hopi tim.

 

Brain drain

Xaverianen tabatin bon tim pero último añanan loke a pasa ta e Brain drain. Muchanan ta kaba skol i bai. Aña pasá tabatin un grupo prominente pero algun a bai Ulanda, Merka i Costa Rica i nan a pèrdè nan. I no ta solamente vòlibòl, pero Xaverianen tabatin tim di basket, tafeltenis, futbòl i vòlibòl. Intenshon tabata pa e kos krese den Suffisant i bira un sentro hubenil. Eric mes no ta hunga vòli, pero e ta trein e hóbennan. Komo e tabata den atletik na hóben, e ta implementá e konosementu aki pa duna e hóbennan training di kondishon.

 

Falta fasilidat pa trein

Training ántes tabata muchu mas fásil. Eric ta kòrda ku na Xaverius College nan tabatin 2 kancha di vòlibòl di kual unu abou i otro mas ariba. I for di mainta e hóbennan ta bai para na porta pa asina porta habri kore drenta i bai para riba fèlt pa hunga vòli. Esei a pone ku Xaverianen a krese. Tabatin temporada ku nan tabatin 2 tim fuerte. Un temporada 2 tim den superior pero no por a mantené pasobra gastunan ta haltu. Ta riba kontribushon nan tabata biba i spònser a bira masha difísil. Antes tabata trein den Xaverius College ku tabata den airu liber pero awor ta bou dak tin di trein i esei ta kosta sèn. I no ta haña e muchanan mas tampoko pasobra Xaverius College a kambia. El a bai huntu ku Fatima College i na e kanchanan di vòli a pone ko’i hunga pa e muchanan. Tin sala Niels Liberia pero tin un tim di basket ta maneh’é i nan tin ‘prime time’. Esaki ta pone ku nan tin di wak kiko pa hasi i e muchanan no ta bai trein vòli asina fásil mas. Tur esaki ta un kambio drástiko. Eric ta kòrda ku ántes su outo tabata manera konvoi. Ta tur mucha kier a bai trein vòli. E tabata kore rònt buska mucha i tin bia kore diferente kareda. Awor aki ta trein na Don Bosco na Buena Vista. Einan e muchanan ta bin di mes pero ora tin wega e transpòrt ta bira un problema. Otro problema ta dirigente esta hende pa yuda ku e hóbennan. Pero e muchanan ta humilde i nan ta tende. Di tur e gruponan ku el a trein, nan ta disipliná. Esun ku no ta disipliná ta bai pasobra e no ta sintié na kas. Awor e ke bai trein mucha mas chikitu tambe. Ounke pa haña mucha chikí tin di wak unda ta trein nan pasobra nan tin di yega kas tempran.

Mester di lidernan

I kiko mester hasi pa haña e deporte aki bèk riba pia. Eric a bisa tin lidernan di deporte ta bai skol aktualmente. Antes ta e mener di skol mes ta duna gym. Por ehèmpel na Xaverius College ta vòli tin pero si no tin fasilidat i no tin material e no ta bai. Eric a bisa ku e tin di drenta skol pa e siña e muchanan na skol i pa asina por haña nan den klup. E sa ku no ta e so tin e problema ei pero mayoria klup tin e problema ei.

 

Ban Topa Xaverianen

Ta kuminsá ku e selebrashon di 60 aña ku e Ban Topa na luna di sèptèmber. Nato Boerleider a splika ku dia 10 di sèptèmber nan ta preparando pa e ban topa ku ta den kuadro di e 60 aña. E ta Ban Topa komo kalentamentu ku muzik, skrin pa mira potrètnan i asina rebibá e tempu di ántes. I p’esei ta usa Komunidat di Fatima kaminda Xaverius tabata i asina ta na e sitio, pa emoshonnan sali. I asina ke hasi algu pa topa e miembronan. Nato a konta ku tur djárason nan ta reuní kue komishon organisadó relashoná kue tareanan di kada persona. I den e kuadro ei kada hende ku nan tarea pa asina kos kana bon. I asina dia 10 di sèptèmber lo tin algu bon organisá. Nato a sigui bisa ku na Kòrsou tin basta miembro di Xaverianen. Ke men no solamente vòlibòl, pero kor, grupo di baile, tur ku a partisipá di un òf otro manera. Entre otro asta e koredónan di bùs ta bon biní na e Ban Topa Xaverianen. Xaverianen a eduká hopi deportista, kantamentu. E disiplina ku nan tabatin ta algu úniko. Nato ta orguyoso ku el a haña e formashon di Xaverianen. E no ta hungadó mas pero ta guia e hubentut pasobra nan ke pa Xaverianen sigui krese.

Kampeon pa hopi aña den hoofdklasse

Moldo Clarissa ta èks hungadó di Xaverianen i e tambe ta forma parti di e komishon organisadó. E tambe a kuminsá den aña 80 ku Xaverianen. Na 1979 nan a sali kampeon i si gana 3 bia e tim ta keda ku e kopa. Nan tabatin gana di gan’é pero Eric a manda nan pa subi di nivel. Nan a subi bai A Klase i a sali kampeon einan tambe, despues a sigui subi kaminda nan a sali na di kuater lugá, siguiente aña supkampeon i despues di esei pa 18 aña largu nan a sali kampeon den hoofdklase. Moldo no aktivo komo hungadó pero pa yuda si e ta disponibel.

 

Promové vòlibòl mas

E problema prinsipal awor aki segun Moldo ta ku tur mayor ta kere ku nan yu tin di hunga beisbòl pa asina por bai den MLB. Ta tur hende ke hunga beisbòl. I despues ta sigui futbòl. Mester kuminsá promové vòlibòl mas den bario i FDDK tambe mester buska moda di upgrade vòlibòl. Tur ta den beisbòl i futbòl. I p’esei tin e problema pasobra ta e deporte ku e lider ta hasi ta esei e ta promové.

 

Produsí bon hungadó

Xaverianen a produsí algun bon hungadó di vòlibòl. Un di nan sigur ta Moldo i tambe Renny Jansen. Renny tabata un di e mihó armadónan den Karibe. Moldo tabata e hòmber di atake, ounke tin mas hungadó ku a saka kara.

 

App group

Relashoná ku e selebrashon di 60 aña, nan a krea un app group Ruta pa 60 aña kaminda tur hende ku manda nan number di telefòn riba 6631562 i lo registrá nan i asina nan lo keda na altura di e aktividatnan i kiko mas. Tin diferente otro aktividat ku ke organisá i ta kuminsá ku e Ban Topa. Nan ke hasi algu entre klupnan di vòlibòl. Tambe nan ke lanta un grupo di sostenedó pasobra mester di fondo. Nan ke bin ku flanèl pa un rekuerdo grandi. I asina tin diferente kos mas. I e selebrashon mes ta otro aña na luna di aprel segun Eric Ogenia a konta. I banda di esakinan lo organisá torneonan di vòlibòl pasobra mester sigui promové e deporte.

 

Hunga vòli ku éksito

I pa un hende ku ke hunga vòli ta eksitoso Eric a bisa ku e hende mester ta un persona ku ke siña. Ku Smash bo no a siña vòlibòl pero e ta eksihí bo kondishon, e forsa i bo mester konosé e wega. Tin yen di kombinashon ku mester siña. Dor di training ta siña e téknikanan di defensa entre otro. Train duru si bo ke logra, segun Eric.

 

Historia Xaverianen

Historia di Xaverianen por wòrdu repartí den tres pida, e promé parti ta di 1964 te ku  1973, e di dos partí ta di 1974 – 1983 i e último partí ta di 1984 – 2020.

Den historia di klup Sint Xaverius College a hunga un ròl masha importante.

Na febrüari di aña 1964 Bruder Henri Kokken(QEPD) a kaba di yega fo’i Hulanda  i a kuminsá siña un grupo di mucha hòmber di skol toka flùit. Na aprel di mesun aña bruder a kuminsá ku un kor di mucha hòmber so. E kor tabata basta eksitoso den su aktuashon na misa, St Thomas College Kranshi Bieu, Habaai i diferente otro sitio na Kòrsou, kaminda tabata trese kanto i komedia.

 

Mas despues den añanan setenta, e promé muchanan muhé a djòin e grupo, tabata un grupo di alumnonan di Stella Maris i konhuntamente a lanta e grupo di aguinaldo Marixavios. ( Stella Maris i Xaverius.) E kor a sigui despues bou di nòmber di Xaverianen. Ku kooperashon di e.o. Stanley de Caster, Edmund Chatlein, Richard Simons, Etsel Provence, Rudy Plaate, Cedric Ridderplaat, Fam. Jesserun, Urvin Frans i de Swinging Scouts Xaverianen tabatin aktuashonnan  eksitoso riba tereno di kanto i teater.

Mas despues a kuminsá ku un grupo di baile folklor bou di guia di Ruben Minguel.

 

Aparte di e meta prinsipal di formashon musikal den e organisashon di Xaverianen a dediká hopi tempu na formashon sosial i rekreashon di e hóben miembronan. Kamper i konosé e área di Banda bou, konosé nos playanan, fiesta, eskurshon informashon deportivo no a hasi falta. For di e tempu ei a traha riba liderazgo i e muchanan di bario ku a resaltá ta: Eric Ogenia, Emilio Louisa i Orlando Cova.

 

E ideal grandi di bruder Henri kokken tabata pa establesé un sentro hubenil den e bario di Suffisant. Na aña 1968 un grupo di sirbidó di misa a djòin e organisashon di Xaverianen. E grupo aki los for di sirbi Misa a kuminsá hunga vòli komo rekreashon i for di e grupo aki e promé tim di vòli  a lanta. Nòmbernan konosí di e tempu ei ta e rumannan Koeiman, Papi  Louisa, Mozes Lourens i Karel Marchena. Den mesun temporada Xaverianen a konosé su tim di futbòl, di basket i tambe di tènis di mesa. Nòmbernan  ku a hunga un ròl importante ta: Richel Clarisa, Henry Bernardus, Roy da Silva da Freitas, Max Willems, Cesar Amasia i mas despues Shurman Salsbach, Gino Farrel, Angelo Virginie pa djis menshoná un par.

 

Aña 68 tabata memorabel pa Xaverianen pasombra den e aña aki tambe a kuminsá ku Vòlibòl femenino i ta dor di e tim femenino Xaverianen a bira grandi den deporte.

Pa straño ku por ta den deporte ta Vòlibòl a bira e deporte mas prinsipal den e organisashon di Xaverianen i atraves di añanan hopi título a wòrdu konkista:

Femenino

1976 kampion di Kòrsou;

kampion di Kòrsou i Antia 1978, 1981,1984, 1985, 1986, 1989, 1990, i 1991.

Maskulino

Kampion klase A 1975, 1980, 1987

Kampion di Kòrsou i Antia

1985 –1989

 

Kampion di Kòrsou

1991 –1994

1996 – 2000

2002, 2003, 2004, 2006 en total Xaverianen maskulino konta te ku 2022 a konkista e título di kampeon di Kòrsou na 18 okashon

kampion hubenil

femenino 1979, 1991, mini 1993

maskulino  B 1980, 1981 1985.

 

Aktualmente direktiva ta hasiendo trámitenan pa konkretisá un sentro den Suffisant de moda ku  por kontinuá ku e trabou balioso ku nan fundadó a kuminsá kuné.