Fayo di siman pasa ta un tersera ku a kibra kabel i no a informa Aqualectra
WILLEMSTAD.-E kompania di utilidat Aqualectra a tene un konferensia di prensa pa di e forma aki duna kuenta i rason na komunidat riba e fayo grandi ku a sosodé ku koriente for di awe mainta tempran. Kòrsou a keda for di mas o ménos 6’or di mainta te basta lat den mainta sin koriente. Esaki a kousa un impakto enorme riba hinter komunidat. Direktor finansiero Neysa Isenia huntu su sr. Garmers a duna informashon pa despues kontesta preguntanan di reporteronan presente na e konferensia di prensa.
Den e kaso di awe ta un ‘schakkelkast’ a eksplotá i kousa un interupshon grandi. Siman pasa tambe Korsou a konosé un situashon di pèrdida di koriente total. Sra. Isenia a splika ku siman pasa a surgi problema na e supstashon na Parera. Investigashon a mustra ku ta un tersera tabata hasiendo trabounan i ku katapila i den kobamentu a kibra un kabel importante. E kompania no a informa Aqualectra di e situashon aki i komo tal no por a prepará pa evitá e problema ku a surgi. Ya kaba a tuma e pasonan legal pa pone e responsabilidat di e daño serka outoridatnan pa asina por kobra e kompania responsabel pa e daño kousa.
Sra. Isenia na nòmber di gerensia a deklará ku tin puntonan fundamental ku mester bini kambio na dje pa loke ta trata produkshon i distribushon di koriente. Lo informa akshonista, BTP komo reguladó i stakeholdernan anto despues lo informa pueblo tambe di e análisis ku hasi.
Esaki no ta nivel di servisio ku pueblo meresé di Aqualectra, e kompania aki ta tuma su responsabilidat hopi na serio. No ta asina ku Kòrsou ta keda 24 ora sin koriente pasobra ya kaba por lo ménos 65% di Kòrsou tin koriente. Pa loke ta trata claim, Aqualelectra a publiká den korantnan i riba nan facebook kon mester atendé e parti di claim, ademas ta bai aselerá e proseso pa den 10 dia mas o ménos lo por duna kontesta na e klientenan, asina gerensia di Aqualectra a informa. Mas detaye den EXTRA.
