App ta insinuá ku partido a pidi e asiento
WILLEMSTAD.- “Ami t’ei te dia mi disidí otro.” Esei ta reakshon di parlamentario pa partido PAR, Zita Jesus-Leito riba un informe ku tabata bai rònt riba ret sosial ku partido lo a pidi su persona pa e entregá su asiento.
Jesus-Leito no ta duna un reakshon riba kontenido i loke ta bai rònt. Si e ta bisa ku ta sumamente laf ku e tipo di informashonnan asina ta bai rònt. Redakshon di EXTRA a risibí un app ayera ku ta bisa lo siguiente:
“Partido PAR, for di último elekshon na 2021 a pidi Zita Jesus-Leito pa no subi lista. El a insistí tòg i al final partido a lag’é riba lista. Den esaki Zita ku a okupá práktikamente tur funshon ku tin pa partido PAR a primintí di traspasá su konosementu pa otro bini na su lugá.
Ku su funshonamentu bou di nivel i krítikanan riba su persona e partido a aserká Zita atrobe pa di manera elegante e retirá i habri kaminda pa otro. E lo a primintí di hasi esaki despues di karnaval, pero 2 siman a pasa i te ainda nada.
Rumornan ta indiká sinembargo ku Zita ta kana papia ku diferente hende den konfiansa i buska konseho. Tambe ta indiká ku e ta rèk e proseso ku intenshon pa al final e bai ku e asiento.
Esaki ta remarkabel pasobra Zita mes tabata kontra di hende ku a bai ku asiento manera Braam a hasi den pasado. Awor e mes ta konsiderá pa dal PAR un kuchú den lomba i bai ku e asiento. Vários prominente di PAR ta pensa ku ta di e forma aki ta logra liberá di Zita, ta mihó e bai ku e asiento numa ku si e keda.”
Segun Jesus-Leito ta bisa, su punto di salida ta konosí pa partido for di 2021. “Esei ta mi ku mi no ta bai niun kaminda i ku mi lo kumpli ku e funshon ku mi ta demokrátikamente eligí den dje te na final.”
For di 2021 konseho di partido no tabata di akuerdo tampoko ku e diskushon si Jesus-Leito mester bai, e parlamentario ta sigui bisa splika. “A trese dilanti den reunion pa laga Zita na pas.”
Awor ku e app aki ta bai rònt e parlamentario ta bisa ku e no ta kansa mi kabes ku e kos aki. “Ken ku ke pensa kiko ku nan ke.”
Lider polítiko di partido PAR, Quincy Girigorie tampoko ta relashoná riba kontenido di e app. Sí e ta bisa: E dianan aki nos ta trahando duru den partido pa presentá un PAR nobo, basá riba e mes un prinsipionan, pero un organisashon mas dinámiko di balor pa añanan binidero. Esaki tabata mi kompromiso ora mi a asumí liderazgo. Den e kuadro ei nos ta hibando kombersashonnan ku tur persona embolbí pa nos sali dilanti komo e partido nobo ei.”
Riba e pregunta si por konfirmá òf nenga ku partido resientemente a pidi Jesus-Leito pa e entregá su asiento bèk na partido Girigorie a bisa ku e no ta komentá riba e pregunta ei.
