NEW HAVEN, CONNECTICUT.- Outoridatnan di e siudat New Haven den e estado Connecticut a informá un ratu pasá ku un total di 25 persona a sufri un sobr’e dosis den un periodo di apénas 3 ora di tempu. Tin asta kasonan ku a haña 4-6 sobr’e dosis den un bia. Tur e kasonan a sosodé den e área di New Haven Green ku ta un parke den e siudat.
Outoridatnan a indiká ku direpente e sentro pa emergensia a kuminsá risibí yamadanan ku ta pidi pa yudansa den e parke. Personal di emergensia ku a yega na e sitio a topa ku diferente persona ku ta duna señal ku nan a sufri un sobr’e dosis. Tabatin hendenan ku ta arohá, otronan tabata duna señal di halusinashon, preshon di sanger haltu, problema ku halamentu di rosea, i tambe nan ta bai flou.
Tin indikashon ku aparentemente e víktimanan lo a usa K2 ku ta un mariwana sintétiko, pero investigadónan ta warda e rapòrt toksológiko promé ku konfirmá e parti aki. Mariwana sintétiko ta ora ku usa material kímiko pa spùit riba e matanan. Segun ekspertonan den e materia, mariwana sintétiko por kousa síntomanan hopi straño.
