BEIRUT, AP.- Vários bombardeo den oranan di mardugá i desena di atakenan aéreo kontra áreanan rebelde den e siudat sirio di Alepo a laga por lo ménos 11 morto djaweps, loke ta subi e saldo den último tres dianan einan na 65, segun indikashon di aktivistanan.
Bombardeonan rebelde kontra áreanan den poder di gobièrnu den e siudat a mata dos mucha muhé na skol. E atakenan aéreo a tuma lugá un dia despues ku un otro atake aéreo kontra e merkado mas grandi na ost di Alepo a mata 15 persona i basha edifisionan abou.
E violensia insesante na Alepo a duna urgensia adishonal na e reunion entre kansier ruso Sergey Lavrov i sekretario di estado merikano John Kerry ku mester tuma lugá djasabra. Esaki ta e promé enkuentro kara kara entre e dos personanan desde e kiebro di kontakto diplomátiko bilateral entre Moscow i Washington debí na e violensia na Alepo e luna aki.
Dos komandante di milisia irakí a bisa ku a kuminsá retirá su forsanan di Siria, kaminda partinan di gobièrnu di Bashar Assad i Estado Islámiko ta bataya pa rekuperá e siudat irakí di Mosul.
E bataya pa Mosul ta esun mas kompliká te ainda pa forsanan irakí, ku ta wòrdu respaldá pa e koalishon enkabesá pa Merka.
Desde ku Estado Islámiko a logra haña Mosul na aña 2014, e ekstremistanan islámiko a wòrdu ekspulsá di mitar di e teritorio ku nan tabata okupá na Irak, segun sifranan di ofisina di promé minister Haider al-Abadi.
