JERUZALEM (AFP).- E promé minister israelí, Benjamin Netanyahu, ta konsiderá komo “horendo” e protestanan pro palestino den universidatnan norteamerikano i a pidi pa stòp ku esakinan.
“E loke ta pasa den kampus universitario norteamerikano ta horendo. Gruponan anti semita ta poderá di e prinsipal universidatnan”, segun e mandatario konservador israelí ta bisa den un komunikado.
“E manifestashonnan ei ta hasi yamada pa destrukshon di Israel, nan ta ataká studiantenan hudiu, ataká profesornan hudiu, bosnan djis kòrda kiko a pasa den universidatnan aleman den añanan 1930”, el a agregá. “Ta algu ku no por permití. Mester para e kos ei”.
Vários universidat norteamerikano a bira foko di protesta kontra dje ofensiva militar israelí lansá pa Israel den Gaza, komo reakshon pa e atake mortífero di komandonan islamita riba teritorio israelí dia 7 di òktober.
Algun studiante i profesor ta akusá e manifestashonnan di aktonan i diskursonan anti semita, algu ku otronan ta nenga, denunsiando intento pa stroba e libertat di ekspreshon.
Den último dianan mas ku shen studiante di universidatnan di New York a keda detené, den intervenshonnan polisial solisitá pa e outoridatnan akadémiko.
Dos presidente di universidat, entre nan di Harvard, a renunsiá di nan trabou algun luna pasá, despues di a keda akusá di no ta aktua ku determinashon kontra dje ante semitismo.
