LIMA, PERU (AFP).- Por lo ménos 25 persona a muri i 13 a resultá heridá ku kaida di un bùs den un abismo den parti nort di Peru. E promé reportenan a señalá 23 morto i 15 herido, di kua dos a muri ora ku nan a yega na hospital. Entre esnan ku a muri tin dos menor di edat, un mucha di seis aña i un beibi di dos luna.
E aksidente a tuma lugá djadumingu anochi riba un karetera ku hopi bògt i un subida kaminda ku e vehíkulo a bòltu i a kai na un profundidat di 200 meter den e provinsia di Celendin, den e region Andino, na 850 km nort di Lima.
E bùs tabata transportá mas di 50 pasahero i tabata dirigí su mes na e distrito di Sorochuco.
“Tin e posibilidat di mas hende ku tabata den e bus pero ku a keda lastrá pa awanan dje riu”, segun un bosero di polis a deklará na televishon.
E heridonan, entre nan e shofùr, a keda hibá na hospitalnan di Celendini i Cajamarca.
Esenanan di dolor a keda registrá den oranan trempan den e region agríkola, kaminda mayoria habitante ta kampesino.
Desena di famia a yega na e komisaria di Sorochuico pa rekonosé i rekohé e kurpanan dje víktimanan reskatá.
E munisipio di Celendin a dekretá un rou di 48 ora.
E aksidentenan riba kaminda peruano ta frekuente debí na ekseso di velosidat, e mal estado di rutanan, falta di indikashon i e poko kontrol di outoridatnan.
Perú den 2023 a registrá un total di 3.138 morto pa aksidentenan den tráfiko.
