CARACAS, VENEZUELA (AFP).- E fiskal general a di Venezuela, Tarek William Saab, ayera a akusá un eks minister di Petroli detené pa korupshon di a konspirá ku dirigentenan di oposishon di Merka pa deroká e presidente Nicolás Maduro.
Tareck El Aissami, otro poderoso figura petrolero, a keda arestá dia 9 di aprel bou sospecho di tin di aber ku desaparishon di un montante di 17.000 mion dollar den e kompania petrolero PDVISA, pa kua tin otro 65 persona detené.
Tarek William Saab a akusá un eks minister di ta “hefe dje mafia korupto i kriminal” i ku e tin di aber ku un “lamentabel konspirashon polítiko vinkulá ku korupshon di PDVISA”, i ku tin relashon ku e eksiliado lider opositor Leopoldo Lopez.
“No tabata solamente korupshon moral, mental, di espíritu i alma, sino tambe e korupshon polítiko, ideológiko ku a pone ku sin nada di bèrgwensa nan a sera kabes ku e enemigunan di mas grandi dje patria”, segun el a agregá. ”Nos a logra gara un grupo di funshonario ku tabata usa no solamente nan funshon pa realisá operashonnan petrolero, sino tambe traha kontra e gobièrnu ku ta legalmente eligí”.
E fiskal a referí na grabashon di kombersashon entre e man drechi di El Aissami, Samark Lopez, i dirigentenan opositor den eksilio, manera Lopez, Julio Borge i Carlos Vecchio.
Lopez a nenga e akusashonnan, ounke el a rekonosé di a papia ku e man drechi di El Aissami.
For di 2017, ministerio públiko a hasi mas di 30 investigashon di korupshon den PDVSA, pa kua tambe a akusá otro tres eks-minister: Nelson Martinez, kende a muri den prizòn, Euglio del Pino, ku ta será, i Rafael Ramirez ku a hui bai Italia.
