BOGOTA, COLOMBIA (AFP).- E hefe negoshadó di gobièrnu di Colombia ku ELN a rechasá e ekspreshonnan dje hefe di gueria, kende a akusá e ehekutivo di traishon, afirmando ku e diálogonan di pas ta pasa den nan momento di mas malu i komo tal nan lo bai evaluá ku ta mantené un periodo di pas, si òf no.
“No por atmití e tipo di ekspreshonnan ora ku gobièrnu a duna tur loke ta posibel pa e periodo di pas por sigui”, segun e representante di gobièrnu, Vera Grabe.
E presidente di iskierda Gustavo Petro a adelantá negosiashonnan ku rebeldenan di Ejército de Liberación Nacional (ELN) for di novèmber di 2022 meimei di turbulensia. E dos partinan na vários okashon a akusá otro di violashon di e akuerdo ku tin, loke a kondusí na un situashon di krísis i suspenshon temporal dje kombersashonnan.
Grabe a reakshoná den un entrevista ku e negoshadó di gueria, Pablo Beltrán, a duna na e korant El Pais for di Caracas.
E lider rebelde, di 70 aña, a trese dilanti ku nan ta “hopi ofendí” ku e gobièrnu aki i ta konsider’é “te hasta mas malu” ku esun di e konservador Iván Duque (2018-2022) i dje liberal Juan Manuel Santos (2010-2018), kende a yega na un akuerdo di pas ku e gueria di FARC den 2016.
“Nunka un gobièrnu a bira den rònt manera esaki. Mi tin komo 10 aña komo hefe di e delegashon i ta e momento di mas malu ku m’a enfrentá” segun el a bisa den un entrevista publiká djaluna.
Beltrán ta rechasá e “negosiashonnan regional” ku e gobièrnu ta hiba ku Frente Comuneros del Sur di ELN den e deportamentu di Nariño, na frontera ku Ecuador, afirmando ku ta trata di un ala desobediente ku tin “un proseso disiplinario”.
Ku arma for di 1964, ELN tin un grupo fuerte di komo 5.800 rebelde, segun inteligensia militar. Ounke nan tin un mando sentral, nan gruponan ta outónomo den kampo militar, loke segun ekspertonan ta stroba e negosiashonnan.
