NEW YORK.- Un eks-editor di prensa a subi den e banki di testigunan djamars den e kaso kontra di Donald Trump i a deskribí kon e tabata retirá historianan negativo riba e magnate inmobilario durante di esaki su kampaña presidensial di 2016.
Trump, di 77 aña, e keda husgá pa a falsifiká 34 dokumento di sifra pa skonde e pago di 130.000 dollar, via di su abogado Michael Cohen, na e eks-strea di sine porno Stormy Daniels den e rekta final di e kampaña presidensial di 2016 ku el a gana sorpresivamente dje demokrat Hillary Clinton.
David Pecker, di 72 aña, eks-editor dje sensashonalista National Enquirer ku tabata e promé testigu di ministerio públiko den e den e kaso históriko kontra di Trump, ku ta tuma lugá na ménos ku shete luna di su revancha sperá pa White House kontra dje presidente Joe Biden.
Pecker a bisa di konosé Trump for di 1989 i a deskribié komo un amigu: “Mi tabata yam’é Donald”.
Tambe el a bisa ku lektornan di National Enquirer “tabata adorá” Trump, ku a protagonisá un eksitoso seri di televishon promé ku el a drenta polítika den 2015.
Pecker ta bisa di a kòrda di un reunion den ougùstùs di 2015 den Trump Tower ku Trump, Cohen i e asistente personal di Trump, Hope Hicks, pa apoyá e kampaña di su amigu pa e nominashon presidensial republikano di 2016.
Nan a puntra mi kiko mi por hasi i kiko mi revistanan por hasi pa yuda den e kampaña. “Mi kontesta tabata di lo publiká historianan positivo riba Trump i negativo riba su oponentenan”.
E eks-abogado personal dje magnate tabata e persona di kontakto. “Mi tabata avisá Michael Cohen di un historia negativo i e mes tabata investigá esei pa sa si ta bèrdat òf no”, Pecher a bisa. “E tabata sigurá pa e historia no keda publiká”, segun Pecker.
Ounke Pecker no a partisipá personalmente den e pago na Daniels, e fiskalnan ta buska pa su testimonio demostrá ku Trump i su abogadonan tabata rekurí na e tipo di práktika ei.
Ta spera ku Daniels i e eks-abogado personal di Trump, Michael Cohen lo ta e testigunan mas importante pa e fiskalnan.