SANTIAGO, CHILE (AFP).- E asesinato di tres polis den un zona indígena den zùit di Chile “ta un tipo di atake ku nos no a mira nunka” den e pais aki, segun e Minister di Interior Carolina Tohá.
E teribel homisidio a tuma lugá djasabra mardugá, den e lokalidat di Cañete, na 500 km zùit di Santiago, e mesun dia ku e kuerpo polisial tabata selebrá un aniversario nobo.
El a keda konsiderá komo e atentado di mas serio kontra di forsanan polisial den e zona, kaminda frekuentemente tin atentado. “Esaki ta un tipo di atake ku nunka promé nos a mira na Chile”, segun e minister Tohá den un entrevista.
A traha un trampa pa e polisnan kendenan tabata den un pikòp blindá pa kontrolá e kumplimentu di órden pa ningun hende sali kas e anochi ei den e region. Pero riba e karetera a tuma lugá diferente enfrentamentu.
E polisnan a muri debí na impakto di bala. Una bes ku a mata nan, a pone nan den baki dje pikòp, pa despues sende esaki na kandela. A hòrta nan armanan i kasko.
“A mata nan pafó dje pikòp pero no sa bou di kua sirkunstansia. No sa tampoko e motibu pakiko nan a baha or di e vehíkulo”, segun e minister.
Te ku ayera nochi ningun grupo a tuma responsabilidat dje atake.
Tres komunidat dje provinsia di Arauco tabatin toke di keda nokturno.
E zona kaminda e insidente a tuma lugá ta bou kontròl militar debí na atentadonan i sendementu di kandela, atribuí na su mayoria na gruponan radikal mapuche, e grupo étniko mas grandi di Chile, ku ta reklamá teranan ku a pertenesé na nan antesesornan.
No mas ku siman pasá ku gobièrnu chileno a selebrá e redukshon te na mitar di kantidat di kasonan di violensia for di despues ku e aktual presidente Gabriel Boric a sinta den mart di 2022.