DACA, BANGLADESH (AFP).- Miónes di studiante a regresá bèk den klasnan na Bangladesh, apesar di un persistente ola di kalor ku a obligá outoridatnan pa suspendé lèsnan siman pasá.
Parti sùitost di Asia ta eksperimentá un kalor ku temperaturanan di riba 45°C miéntras ku den Bangladesh durante siman pasá tabata entre 4 i 5°C mas haltu ku e promedio di último 30 añanan den e mesun periodo di aña.
Segun vários investigashon, e kambio di klima ta provokando olanan di kalor kada bes mas largu, mas frekuente i mas fuerte.
E alumnonan a regresá skol den un ambiente marká pa nerviosismo di hopi mayor pa e siman aki di aktividatnan segun kalendario di Islam ku ta kore di djadumingu pa djaweps.
Alrededor di 32 mion alumno siman pasá no a bai skol, segun e organisashon Save the Children. Segun outoridatnan, e siman aki e orario di lèsnan lo keda redusí.
Departamento di Meteo di Bangladesh a informá ayera ku e ola di kalor lo sigui pa sigur tres dia mas.
Muhamad Abul Kalam Mallik, di Departamento di Meteorologia, a indiká na AFP ku for di 1983 ku a inisiá ku midimentu di temperatura na Bangladesh, nunka a eksperimentá un kalor asina intenso.
