Newton: A haña lisensia nobo mas amplio di OFAC
WILLEMSTAD.-Un bon relashon ku Venezuela ta importante, asina Patrick Newton direktor interino di Refineria di Kòrsou (RdK) a deklará na e momentu históriko ku a firma e akuerdo entre PDVSA/ Venezuela i RdK/Kòrsou. E akuerdo ta enserá prinsipalmente un ‘settlement’ di e loke PDVSA debe RdK i tambe trahadónan, wèrfano, kontratista i otronan na Kòrsou.
Newton a splika ku semper abogadonan ta bisa ku mester yega na un akuerdo riba e debe. Newton a gradisí promé minister Pisas i su hunta di komisario. A yega na un ‘settlement’ ku tur partido den e kaso aki por ta kontentu kuné. E ta un bon dil pa Kòrsou i PDVSA i e ta habri kaminda pa koperashon mas estrecho ku Venezuela pa futuro.
‘Nos ta bai drenta era nobo, pasobra PDVSA ta bai tin ròl importante. Tin reunionnan tumando lugá entre PDVSA i kompanianan ku RdK ta negoshando kuné. Esei ta importante pa un sektor petrolero fuerte. Nos mester krea kuponan di trabou stabil. Sektor petrolero n Kòrsou mester logra na kontribuí por lo ménos 10% di GDP atrobe. Mester invertí den hubentut pa nan por haña trabou tékniko pa futuro. Mester tin fe i perseveransia. E kaminda ta duru, esei ta un realidat”. Mas aleu e direktor di RdK a bisa ku paralelo na e ku e proseso importante aki RdK tabatin kombersashon serio ku OFAC. Luna pasa a sera un akuerdo nobo ku OFAC. E lisensia nobo di OFAC ta permití Kòrsou i RdK di risibi krudo di Venezuela i komersialisá esaki. Mas detaye den edishon di EXTRA.
