Tambe 21 mion dòler pa trahadónan/wérfano,penshonado i kontratista
WILLEMSTAD.-Premier Pisas awe a duna informashon na komunidat kiko e akuerdo entre Refineria di Kòrsou/RdK i PDVSA/Venezuela ta nifiká konkretamente. Den algun palabra a sera un akuerdo den kua PDVSA ta paga 450 mion dòler na Kòrsou i RdK den un periodo di 10 aña i banda di esei ta paga 21 mion dòler pa kumpli ku loke debe na wérfano, penshonadonan, trahadónan i kontratistanan na Kòrsou. Premier Pisas a yama danki na tur miembro di su gabinete, na RdK i spesialmente na presidente venezolano Nicolas Maduro ku a duna bendishon kompletu na e akuerdo entre Kòrsou i Venezuela.
E promé minister di Kòrsou na okashon di firmamentu di e akuerdo a yama danki na tur minister den su gabinete pasobra nan a demostrá ku nan por funshoná huntu i ku nan por wanta un sekreto. Aña pasa Pisas a bai Nashonnan Uni, i el a konfia su koleganan ku e úniko motibu ku e ke bai ta pa buska aserkamentu ku Venezuela. El a pidi yudansa di otro premiernan di Aruba i St.Maarten pa yud’e haña e boot di outoridatnan venezolano. úniko kos ku el a hasi ta entrega e outoridatnan venezolano un karta ku su number di telefòn pidiendo pa nan por tene kontakto. Dentro di un ora e promé app a drenta i asina a sigui te awe.
Pisas a atmití ku na dado momentu e situashon tabata difísil pasobra na momentu ku Hulanda ta papiando Kòrsou no por a hasi nada, pero a tene pasenshi. Newton (RdK) tambe a atvertí Pisas ku ora Hulanda ta bezig Kòrsou no por hasi nada. Finalmente a logra kontakto ku outoridatnan venezolano i den silensio a traha duru mustrando ku refineria ta punto primordial pa Kòrsou.
Segun Pisas, e punto mas difísil tabata pa konvensé Patrick Newton pa legumai e kaso den korte i bai mesa ku Venezuela. Pisas a papia ku venezolanonan indikando ku Korsou no por ta den korte kontra Venezuela te na Oropa miéntras ku e dos paisnan aki ta na djis algun minüt for di otro. Echo ta sinembargo ku legumai kaso den korte ta un riesgo hopi grandi pero e ta kontentu ku Newton a konfia den dje. A keda alarga e proseso te ora a logra.
Kiko a logra:
A yega na un settlement despues di hopi negoshá. Presidente di Venezuela sr. Maduro a pone su bendishon pa paga Kòrsou 450 mion dòler den 10 aña. Na di dos lugá a pone 21 mion dòler pa kumpli ku trahadónan, penshonado, wérfano i kontratistanan. Pisas tabatin palabranan di apresio inmenso pa su kolega Charles Cooper ku a bai pa firma ku Venezuela i a logra algu mas ku loke a palabra originalmente. Ta Cooper a bai Venezuela pa seya e dil ku Venezuela i PDVSA ora Pisas tabata malu.
Ademas Venezuela a komprometé pa sigui traha riba e proyekto di gasodukto ku ta e konekshon entre Kòrsou i Venezuela pa gas for di Venezuela.
Pisas a bisa ku tur kos ta un proseso. El a pidi tur yu di Kòrsou pa korda ku ora ku bati kibra, ta Kòrsou nos ta bati kibra.’ Tur sobra detaye di e akuerdo den edishon di EXTRA.
