Update:
WILLEMSTAD – Polis a logra identifiká e víktima hañá morto riba laman ta drif riba djadumingu 18 di yüni 2023 último. E víktima a keda identifiká komo Sidney Henk Dometilia , nase na Kòrsou 29 di òktober 1962.
Tur kos ta indiká
Polis ta papia di kaso di asesinato
WILLEMSTAD.- Kòrsou a konosé un morto trágiko i horendo, na momento ku a deskubrí un kurpa sin bida ku tabata drif riba su barika den bahia di Playa Canoa.
Ayera den oranan di mèrdia pa mas eksakto 2.10 or ora sentral di polis a haña notifikashon di algun persona ku a yama bisa di ta mira un kurpa ta drif den awa. Tambe e personanan a indiká ku ta parse ku man i pianan di e persona tabata mará ku kabuya.
Polis ku a presentá na e sitio enbèrdat a haña un kurpa ta drif. E persona tabatin un flanèl bèrdè, un djins i un tas di Louis Vuitton.
Unidat di brantwer, Warda Kosta i polis ta esnan ku a yuda saka e kurpa ku tabata pegá den baranka.
Dòkter di polis a presentá i a konstatá morto di e víktima. Polis a tuma nota ku ta trata di un kurpa di un hende hòmber. Aparentemente e kurpa tabatin un marka di kemadura na su lomba, mannan i pianan tambe tabata mará i banda di esaki su garganta tabata mará ku ‘tyrap’.
E kurpa tabata intakto ainda, loke por konkluí ku e no tin asina tantu tempu den laman. Polis a sera e área kompleto pa investigá posibel pista ku por kondusí na esnan kulpabel di e asesinato kruel aki.
Segun bosero polisial sr. Rosalina, tin tur indikashon ku lo ta trata di un kaso di asesinato. Riba òrdu di fiskal i Ministerio Públiko a konfiská e kurpa sin bida pa mas investigashon.
[…] Polis a identifiká kadaver na Playa Kanoa […]