SAN FRANCISCO, AP.- Yahoo a konfirmá ayera ku ‘ hackers’ a hòrta informashon personal di 500 mion di nan kuentanan, un violashon masivo di seguridat ku e kompania ta atribuí na un patrosinadó di un estado.
E insidente, e gòlpi mas resien pa e kampaña, ta sali na kla na 2014. Ta den e aña ei ladronnan sibernetiko a piratiá e sentronan di datonan di Yahoo, asina e empresa a bisa. Pero ta resien e problema a keda deskubrí resientemente durante un investigashon interno.
E datonan hòrtá ta inkluí nòmber di usuarionan, adrès di email, fecha di nasementu, password i pregunta di seguridat i su kontesta, usa pa verifiká e identidat di e propietarionan di e kuentanan.
Luna pasá, e portal teknológiko Motherboard a reportá ku hackernan ku a usa e nòmber Peace tabatin informashon di kuenta di 200 mion di usuario di Yahoo i tabata tratando na bende esaki riba Internet.
Yahoo ta rekomendá pa tur usuario kambia nan password si esaki no a keda modifiká despues di 2014. E empresa ku sede na California a bisa ku su investigashon no a topa niun evidensia di ku informashon riba kuentanan bankario i tarhetanan di krédito òf debito si usuarionan a keda hòrta den e atake. El a indiká ku no tin evidensia di ku e atakante ta sigui riba e ret di Yahoo.
E notisianan di falta di seguridat por hasi ku algun persona ta pensa dos biaha promé di usa e servisionan di Yahoo, kual ta representá un problema pa e empresa na e momentunan aki ku e ta trata di benta su operashonnan digital ku Verizon Communications pa 4800 mion di dòler.
