BRUSELAS, BELGIKA, AP.- Apple lo mester paga 13.000 mion euro mas interes na impuesto atrasá na Irlanda despues ku Union Europeo a determiná ku empresa teknológiko merikano práktikamente no a paga impuesto den 28 pais di e bloke durante mas di 11 aña.
Esaki ta e último intento den e bataya di Komishon Europeo pa multinashonalnan paga impuesto ku ta korespondé na e region, kaminda indignashon popular kontra evashon empresarial di impuesto ta kresiendo despues di vários aña di krísis finansiero i ousteridat presupuestario.
UE ta bisa ku Starbucks, Fiat, Amazon i mayoria multinashonal mas a logra akuerdo ku paisnan di UE pa instalá su operashonnan europeo a kambio di impuesto inusualmente abou.
Un investigashon di tres aña a mustra ku Irlanda a konsedé bentahanan importante na Apple durante tantu aña ku e kantidat real di impuesto pa multinashonal a baha di 1% den 2004 a 0,0005% na 2014. Asina komisario di Kompetensia di UE, Margrethe Vestager a bisa djamars.
Segun e último tasa di impuesto, pa kada mion di euro di benefisio, Apple a paga solamente 50 euro di impuesto.
“Awor Irlanda mester rekuperá impuesto ku Apple no a paga entre 2003 i 2011, mas di 13,000 mion euro, ademas di interes”.
Pa Irlanda, un pais di 4,6 mion habitante, e suma ta ekivalente na risibí mas di 2.800 euro pa kada hòmber, muhé i mucha.
