ORANJESTAD.-Kuerpo polisial di Aruba ta informa ku den e mardugá tras di lomba a surgi un aksidente hopi grave na altura di eks House of Cheng. Un persona a pèrdè su bida den e aksidente aki.
Tabata mas o ménos 03:25 am ku sentral di polis a risibi e informashon di e aksidente na e sitio ya menshoná. Na yegada di e promé patruya a topa ku un vehíkulo Nissan March kolo shinishi i ku e number A-65717 pega riba un mata. E patruya a topa ku siudadanonan mes a kuminsá trata na reanimá e víktima. Ambulans a yega na e sitio i a hasi nan maksimo esfuerso, pero ya no por a hasi nada mas pa e víktima.
Dr. Mungra a konstatá morto 04:09 am di e hòmber Bay Kelvin Zambrano Burgos nase 18 desèmber 1996 na Aruba. Polis di tráfiko ta hasiendo investigashon.
