ANKARA, TURKIA, AP.- Un serie di eksploshon kontra forsanan di seguridat di Turkia i atribuí na rebeldenan kurdo a laga por lo ménos 14 morto i 220 herido. Asina outoridat a informá djaweps.
Dos di e atakenan tabata di outo bòm kontra kartelnan polisial na ost di Turkia, miéntras e terser a tuma lugá den sùitost di un karetera kontra un vehíkulo militar ku tabata transportando algun sòldat.
Outoridatnan a kulpa Partido di Trahadó di Kurdistan (PKK), kual a kuminsá un kampaña di atentado kontra komisarionan i polis. Siman pasa, e komandante kurdo Cemil Bayik a menasá ku subi su atakenan kontra e kuerpo di siudatnan turko.
E ola di atake ta tuma lugá na momentu ku gobièrnu di Turkia a lansa un ofensiva kontra siguidónan di Fetullah Gulen, un klérigo islámiko ku ta biba na Merka. Gobièrnu ta akusá Gulen di a organisá e intento di gòlpi di estado di luna pasá ku a laga por lo ménos 270 morto. E promé bòm a eksplotá na warda di polis den provinsia oriental di Van i a mata un agente di dos sivil djárason anochi. Por lo ménos 73 persona mas a sufri algun herida. Algun ora despues di e promé eksploshon i otro bòm a sakudí un sede polisial na Elazig. Sinku agente a muri i 146 persona a resultá heridá.
