WILLEMSTAD.- Centrale Bank van Curaçao en Sint Maarten (CBCS) a entregá keho, inkluso na nòmber di Ennia, na e instansia disiplinario di accountancy na Hulanda kontra dos di e èks akountentnan eksterno di SunResorts Ltd. N.V. (SunResorts). A entrega e keho dia 15 di mart último.
SunResorts ta un empresa filial di EC Investments B.V. i ta hunga un papel krusial den grupo Ennia, ya ku e ta doño di un tereno basta grandi na Mullet Bay (Sint Maarten) ku ta sirbi komo respaldo pa Ennia por kumpli ku su kompromisonan ku su doñonan di pólisa. Na opinion di CBCS, e akountentnan eksterno menshoná a violá, na diferente manera, e reglanan di kondukta i profeshonal ku ta konta pa nan, inkluso e prinsipionan fundamental riba tereno di kompetensia profeshonal i diligensia. CBCS a pidi Accountantskamer na Zwolle tuma e medidanan disiplinario adekuá.
