WILLEMSTAD.-Miembro di Parlamento Gwendell Mercelina a bai laboratorio awe mainta i a hasi su test di droga. E test ta spesífikamente pa test si tin señal di mariwana òf kokaina den su sistema. Manera EXTRA a informa kaba Mercelina ta rechasá tur posibel insinuashon den su direkshon di parti di kolega parlamentario, pa kolmo di mesun partido sra. Djaoen-Genaro ku lo tabatin ‘hende’ ta usa droga den baño na Colombia.
Mercelina despues di a hasi su test a bisa ku e no tin nodi di hasi e test paso e sa di su mes, pero na momentu ku difamashon tuma lugá i ku hende tin ku gaña pa tapa e bèrdat, ta bira nesesario pa tuma e pasonan aki. El a korda tur hende ku promé ku e bira polítiko e tin un karera profeshonal.
‘Mi no a usa droga den mi bida i mi no ta bai usa tampoko, mi ta un polítiko progresivo i ta miembro di PNP i pesei ta importante pa mustra e diferensia. Mi no tin kondena riba droga ni pa niun otro kos. Mi no ta sospechoso den niun kaso kanando. Si ta bai hiba diskushon riba moralidat den polítika, nos ta hasié bon. Desde awe tur hende ku drenta Parlamento bai proba nan mes. Tur dia por test mi i tur hende lo haña mi limpi”. Mas detaye den edishon di EXTRA.
