ASUNCION, PARAGUAY,AP.- A detené un belga i un mehikano na Paraguay, pa e supuesto intento di kontrabanda pa e siudat merikano di Atlanta ku un meskla di oro, bròns, zink i otro metalnan.
Fiskal Aldo Cantero a informá djabièrnè ku e kargamentu di 480 kilo konfiská pa duana di e aeropuerto di Asuncion, ta transportá pa Banko Sentral pa motibunan di seguridat.
E avion tin matrikulá N111FA i segun e plan di buelo verifiká pa Maneho di Aeropuerto Sivil, esaki a yega México i mester a sali pa Atlanta i di einan pa China.
“E téknikonan a analisá e kontenido di 36 staf di 360 i a haña diferente metal, pero solamente 6% di oro ta meimei di esakinan. Lo tuma algun dia mas pa studia sobrá bara”, asina Cantero a informá.
Esnan detené ta un belga Didier Marc Andre di 52 aña, propietario di ‘jet’ Gulfstream III i e mehikano Jose Salazar Tinajero di 53 aña.
Fiskal a splika ku si eventualmente komprobá eksistensia di oro den tur bara, e preis total lo ta di 10 mion dòler.
