CBCS a oumentá su nivel di resistensia finansiero i su entradanan
WILLEMSTAD.- Banko Sentral di Korsou i Sint Maarten a informa ku resientemente e instituto a bende 30% (125,000 di e total di 420,394.993 fine troy ounce) di su reserva total di oro i a invertí e ganashi den bono di gobièrnu merikano ku interes fiho. Di e manera akí, CBCS a oumentá tantu su nivel di resistensia finansiero komo su entradanan. E komposishon mas óptimo akí di e reserva ofisial i e oumento di entrada ku e lo trese kuné lo tin un efekto positivo riba e resultadonan di CBCS i riba e pago di dividendo anual na Kòrsou i Sint Maarten.
‘Promé ku e benta, CBCS no tabatin kapasidat pa apsorbé pèrdida operashonal. Debí na esei, kada bes ku tabatin un shòk finansiero, konforme Statüt di Banko, e Paisnan tabatin ku reabastesé CBCS su kapital inmediatamente’, Presidente di CBCS, Doornbosch ta splika. ‘CBCS ke enfatisá ku e benta di oro a trese kuné únikamente un kambio den e komposishon di e reserva ofisial. E kantidat total di reserva a keda meskos. Pues, e transakshon akí no ta afektá stabilidat di e tasa di kambio fiho di florin i dòler merikano. E tasa di kambio fiho ta keda stabil i garantisá’, segun Richard Doornbosch. Mas detaye den edishon di EXTRA.
