WILLEMSTAD.-Kolegio di Supervishon Finansiero (CFT) den un karta dirigí na Minister di Finansa sr. Javier Silvania ta duna sosten na gobièrnu pa kontinuá ku loke tin riba mesa komo ‘solushon Ennia’. CFT ta insistí pa keda na altura di tur desaroyonan den e kuadro aki. ‘Met inachtneming van bovengenoemde punten acht het Cft het verantwoord verder uitvoering te geven aan deze ENNIA-oplossing, en verzoekt over de nadere uitwerking steeds op de hoogte te worden gehouden.”
E karta ta fecha 12 yanüari 2024. Manera EXTRA a informa detayadamente durante di último tempunan, gobièrnu di Kòrsou a presentá un posibel senario komo solushon pa e situashon pa e kompania priva ENNIA despues ku doñonan a saka sumanan grandi for di e kompania di seguro. E impakto sosio ekonómiko ta demasiado grandi i den e kuadro ei gobièrnu di Kòrsou a opta pa buska solushon. Den e kuadro aki minister di finansa a pidi opinion di e Kolegio di Supervishon Finansiero. Tin un akuerdo entre e paisnan Kòrsou i Sint Maarten i tambe Banko Sentral, di 15 di desèmber 2023, pa loke ta trata e ‘solushon’ riba mesa.
CFT ta mustra satisfakshon ku e partidonan ariba menshoná a yega na akuerdo pa un solushon aseptabel pa un problema finansiero hopi grandi. Pa yega na e solushon aki e partidonan a hasi un kompromiso serio ku otro pa un periodo hopi largu.
Sin embargo den e kompromiso aki tin rísiko tambe! Pasobra ta durante 30 aña Kòrsou mester reserva un suma grandi riba su presupuesto. E espasio finansiero ta tiki i banda di esei e presupuesto tin ya kaba otro rísikonan. Un di e riesgonan aki ta e situashon di Curaçao Medical Center i tambe e suma ku gobièrnu ta premirá di kobra for di pèrmit pa online gambling. E echo ku Kòrsou ta boga pa refinansiá e porsentahe di interes riba e debe di 911 mion florin, CFT ta di opinion ku no ta bon pa bai usa e espasio ei ku un redukshon di interes lo trese pa mara esaki mesora na otro debe. Hopi detaye importante mas den edishon di EXTRA.
