BEIJING, AP.- Un guera di impuesto ku ta birando grave entre e dos ekonomianan mas grandi di mundu a oumentá djárason pa miedu di un guera komersial na nivel internashonal i a pone ku e merkadonan ta sukumbí. Pero esaki a laga porta habrí pa un posibel akuerdo ku por prevení kualkier daño grave.
E promedio industrial Dow Jones a baha despues ku merkadonan den Europa i Asia a terminá ku pèrdida, preokupá pa e disputa komersial entre Merka i China.
China a oumentá impuestonan di merkansianan merikano ku 50.000 mion dòler ku ta inkluí soya, avion i outo, den kontesta pa e subida di impuestonan proponé pa Washington na importashonnan chines, tambe pa e mesun kantidat di dòler.
Merka lo no apliká impuesto mesora. E pais a kuminsá ku un periodo pa risibí komentarionan di públiko kual ta terminá riba 11 di mei i tin un oudiensia riba e tema programá pa dia 15 di e mesun luna. Empresanan i konsumidónan lo tin e oportunidat di duna indikashonnan pa algun produkto wòrdu retirá di e lista òf inkluí otronan.
Outoridat fiskal chines tampoko no a bisa na ki momentu e impuestonan di 25% di importashon lo drenta na vigor, pero a indiká ku esaki ta dependé di kiko e gobièrnu di Donald Trump hasi tokante impuestonan ku e pais tin planiá di pone kontra vienes chines.
E lista di 106 produkto elaborá pa Beijing ta inkluí e eksportashonnan mas grandi Merka pa China. E disputa ta debí na un keho di Merka, kual ta afirmá ku Beijing ta preshoná empresanan estranhero pa entregá su teknologia a kambio di konsedé nan akseso amplio riba e pais su merkado.
