TOLEDO, OHIO, MERKA, AP.- Hillary Clinton a kritiká Donald Trump pa su deklarashonnan fiskal, su spiritu empresarial i su falta di kredibilidat, den un intento pa probechá di e vershonnan periodístiko ku e magnate di New York no a paga impuesto federal durante vários aña, un di e tantu revelashonnan ku a sakudí e kampaña di e kandidato presidensial republikano. Den un akto polítiko realisá den un stashon di riel den sentro di Toledo, e kandidato presidensial demókrata a pinta Trump komo empresario ku kurason friu ku “ta representá e mesun sistema rígido ku el a primintí di ta bai kambia”.
Clinton a proponé e grabashon di un lei pa obligá kandidatonan presidensial di partidonan prinsipal pa presentá su deklarashonnan di impuesto, algu ku Trump a oponé kontra dje. El a akusá Trump di evitá su responsabilidat komo kontribuyente.
Esaki ta e promé reakshon di Clinton kontra un artíkulo publiká siman pasá den korant di The New York Times, segun kual Trump a deklará pèrdida neto di kasi 916 mion dòler den un aña.
Trump a apstené di menshoná su problemanan fiskal durante un akto ku eks sòldatnan na Virginia.
