WASHINGTON, AP.- Colin Powell a atmití ku el a duna Hillary Clinton e idea, pa usa un kuenta privá di meil pa asuntunan di trabou. Powell a hasi esaki, despues ku Clinton a remplas’é komo sekretaria di estado na 2009.
Den un komunikado fasilitá na AP, Powell a bisa ku el a manda un mensahe pa Clinton, deskribiendo su uso di kuenta persona AOL pa asuntunan ku no ta di seguridat haltu, na momentu ku e tabata sekretario di Estado bou di presidensia di George W. Bush.
Powell, kende t a republikano, a relatá ku el a komentá ku Clinton, ku e uso di meil personal “a mehorá’ e komunikashonnan ku personal diplomátiko ‘drástikamente”, kual na e momentu ei no tabatin un sistema elektróniko interno.
Powell a bisa ku ta posibel ku FBI a haña un kopia di su mensahe pa Clinton, den transkurso di su investigashon pa uso ku Clinton a hasi di un ‘server’ privá pa atendé asuntunan sensibel, na momentu ku e tabata sekretaria di Estado.
Eventualmente, FBI a terminá e investigashon ku e deklarashon ku no tabatin fundamentu pa un proseso hudisial kontra Clinton. Awe Clinton ta kandidato presidensial di Partido Demókrata.
Powell, kende tabata general di ehérsito i hefe di estado Mayor Konhunto, a bisa ku el a usa un kòmpiuter konektá na un ret seif, riba su eskritorio den departamentu di Estado. Esaki el a hasi pa atendé asuntunan konfidensial.
Kompará ku Clinton, Powell a usa un servisio komersial di internèt pa su kuenta di meil personal. Clinton tabatin un server privá den bodega di su kas den estado di New York.
