Alrededor 3000 vehíkulo a kima riba barku Fremantle Highway
EEMSHAVEN.-E trabounan pa saka tur vehíkulo ku tabata na bordo di e barku Fremantle Highway a kana bon. Tur vehíkulo ku tabata na bordo inkluso esnan ku a keda intakto lo keda destruí, asina e informashon ta indiká.
E barku tabata kargá ku hopi vehíkulo di luho di markanan di renombre i tambe ekipo pisa manera kran i otronan. Na promé bista por a mira Vehíkulonan di e markanan Mercedes Benz, BMW i Mini Cooper. Alrededor di 3000 vehíkulo ta totalmente destruí, miéntras ku tin algun vehíkulo luhoso ku a haña solamente huma. Total a baha 3784 vehíkulo for di Fremantle Highway.
Trahadónan ku tabata sakando e Vehíkulonan ta konta ku a keda un stof diki i vèt riba e Vehíkulonan. Esei ta kuadra tambe ku e echo ku a eksigí pa tur trahadó di reskate bisti un ‘overall’ blanku ku ta tapa for di kabes te pia. Aparentemente lo tin miedu pa kímikonan peligroso ku por a keda den airu debí na bateria i otro piesa di outonan elektróniko ku a kima.
Kasi 4000 vehíkulo tabatin na bordo di e ‘roll on roll òf ship’, ku ta e tipo di barku ku sa drenta haf di Kòrsou yen di outonan ku ta keda importá riba nos isla. Tabata na yüli 2023 ku un outo eléktriko a pega kandela, segun informashonnan di e tempu ei, i a pone ku hinter e barku a pega na kandela. Un persona a pèrdè su bida, miéntras ku hopi miembro di e tripulashon a bula na awa den spantu di e kandela asina grandi. E aksidente a tuma lugá den e área di Ameland, banda di e islanan na kosta nort den e área di Leeuwarden Hulanda.
