Rapòrt di Kontraloria General ta mustra ku
WILLEMSTAD.- Situashon di nos kayanan a bin dilanti den rapòrt di Kontraloria General. I nan por konkluí entre otro ku e sumanan presupuestá di 2017 pa 2021 no a keda usá kompletamente.
A base di e resultadonan, Kontraloria General ta konkluí ku e gobièrnunan di turno no a formulá meta stratégiko bon kla pa maneho i mantenshon di kaminda, i no a sòru sufisientemente pa tradusí e meta/intenshonnan na e Ministerio i pa ehekutá esakinan.
Tambe, nan a yega na e konklushon ku, en general, kalidat di e kamindanan públiko, manera a resultá for di e inspekshon ekstenso den 2016, siguí pa e inspekshonnan den 2019, ta regular te malu. Prinsipalmente e kayanan di bario ta di ménos kalidat. E kamindanan prinsipal ta di mihó kalidat, pero debí ku no tabatin inspekshon di kalidat resientemente, no ta konosí si kalidat di e kamindanan prinsipal aki te ainda ta regular te bon.
Dor di e falta di relato anual i dokumentashon di kontròl di kalidat, ta difísil pa chèk si e gobièrnunan den e último añanan a laga hasi sufisiente mantenshon na e kamindanan prinsipal i si e mantenshon a kumpli ku e normanan di kalidat.
UO OW a indiká ku nan no ta disponé di sufisiente fondo, forsa laboral i material pa por ehekutá e plannan di mantenshon anual. Sin embargo, esaki no ta kuadra pa tur e añanan, pasobra den e añanan 2017 te ku 2021, e montantenan presupuestá no a wòrdu usá kompletamente. Ta trata akí di presupuesto no utilisá pa kua UO OW no por a duna un splikashon.
Segun UO OW, e Ministerio no ta disponé di sufisiente fondo pa por ehekutá e plannan anual di mantenshon. Segun UO OW, e falta di fondo ta wòrdu okashoná dor di tres aspekto, esta:
no por presupuestá e fondonan real ku ta nesesario. Dor ku, segun UO OW, kada bes ta kòrta den e presupuesto deseabel di e Ministerio, nan mester adaptá nan presupuesto i sierto proyektonan ta wòrdu mandá pa un siguiente aña;
no por disponé di e presupuesto kompleto. UO OW ta menshoná prinsipalmente kaso urgente i inesperá, i faktura atrasá, komo motibu ku e espasio disponibel riba presupuesto di UO OW ta wòrdu limitá. Nan ta indiká ku, dor di esaki, kada aña ménos proyekto por wòrdu ehekutá. Sin embargo, den práktika, ta parse ku e presupuestonan di e añanan 2017 te ku 2021 no a wòrdu surpasá, i UO OW no por a splika e motibu dikon e gastunan a keda bou di e presupuesto;
no por disponé di sufisiente likides pa por ehekutá e proyektonan. Segun UO OW, proyekto ku ta sigui den e siguiente aña i faktura atrasá tambe ta baha e likides disponibel den un sierto aña.
Kontraloria General ta bisa ku miéntras no regla pa por tin sufisiente fondo, forsa laboral i material disponibel, maske traha maneho i plan di mantenshon, e trabounan di mantenshon lo no por wòrdu ehekutá (óptimamente).
Pa por atendé ku e problemátika di likides, e minister tin intenshon di hasi un fiansa na balor di NAf. 310 mion. Ku esaki, MOP por wòrdu finansiá pa asina eliminá e atraso den mantenshon. Minister ta deseá di fia e montante aki riba merkado finansiero lokal i pag’é bèk den shete aña. Te na momento di publiká e rapòrt di Kontraloria General, apesar di petishon frekuente na UO OW, nan no a logra risibí informashon tokante státus di tantu e finansiamentu komo e adaptashon di e Ordenansa Nashonal MRB.
Banda di e eskases di fondo, segun gerensia, UO OW ta hañ’é konfrontá ku falta di personal i material. Apesar di eskases di personal, ainda UO OW no a traha un plan di kapasitashon pa inventarisá e eskases di kapasidat. Pa loke ta trata material, ta parse ku UO OW no ta disponé di tur e material nesesario pa por ehersé e trabounan óptimamente.
