Neysa Isenia Direktor Finansiero di Aqualectra:
WILLEMSTAD. – Neysa Isenia Direktor Finansiero di Aqualectra a splika ayera kon leu nan ta komo kompania di distribushon di awa i koriente, despues di e blackout nan ku tabatin. Isenia a splika ku nan a tuma nan responsabilidat den e loke ku a pasa i nan a habri tur porta pa e investigashonnan kuminsá. Nan a sòru pa siña for di e proseso di investigashon i nan a sòru pa nan tuma mas enseñansa pa yega na un kompania ku por garantisá suministro di koriente.
Isenia a splika ku ta despues di 13 aña Kòrsou a konosé su promé blackout. Esaki tabata na aña 2019 ku 1 blackout, despues na 2020 tabatin 4 balckout, na 2021 Kòrsou a konosé 1 blackout i na 2023, 3 blackout i un asina yamá 1 brownout. Pues na total 9 blackout entre di 2019 pa 2023.
Esaki tabata motibu ku Aqualectra a hasi diferente investigashon tantu interno, tambe hunta di komisario a hasi nan investigashon, miéntras Minister enkargá ku ekonomia a enkargá BT&P, pa realisá un investigashon independiente. E investigashonnan a resultá den diferente rekomendashon, loke ku Aqualectra a uni su mes na e konklushonnan i rekomendashonnan di entre otro BT&P.
Di parti di Aqualectra su investigashon ta sali afó, ku 9 di e 10 blackout nan ku ta tin ta debí na protekshon. Esaki pa motibu ku e sistema di protekshon di Aqualectra ta dinámiko i esaki ta pone ku nan a yega na konklushon pa revisá esakinan ku mas frekuensia i realisá simulashonnan, manera rekomendá.
Un otro aspekto ku a bin dilanti ta ku na e momentunan aki e vulnerabilidat den e ret a keda redusí supstansialmente debí ku nan a implementá 70% di tur e diferente rekomendashonnan ku tabatin. Pa loke ta trata e sobrá 30% ku falta ta debí na entrega di ekipo o sea material. Esaki tin di aber ku e sistema logístiko ku ta pone ku mester warda basta pa ekiponan yega Kòrsou. Esaki no ta un situashon pa Kòrsou so, pero ta un problema mundial.
Pa evitá ripitishon di mas blackout, Aqualectra a tuma pasonan huntu ku ekspertonan kaminda a traha tambe filosofia di protekshon, ku a defini “setting” nan pa e sistema di protekshon i tambe a traha plan di implementashon pa e “setting” nan. Isenia a splika.
