Representantenan Flow i Aqualectra a rekonosé nan kabelnan:
WILLEMSTAD. – Ladronisia di kabel den último simannan a lanta kabes i konsekuentemente na algun okashon, e ladronisianan aki ta pone ku henter bario ta keda sin koriente. Esaki a pone ku Kuerpo Polisial a forma un union ku e instansianan ku ta víktima di e ladronisianan aki, ku ta Aqualectra, Flow i Digicel pa wak kon por bringa e fenómeno aki. Ayera tabatin aresto di dos hende hòmber na un kas den Montaña Abou Bieu, momentu ku nan tabata kimando e kabelnan opa saka koper.
Den deklarashon pa redakshon di Extra, Bosero di Polis Mauritsz Rosalina a duna di konosé ku ayera mainta Sentral di Polis a haña notifikashon ku lo mester tin kimamentu di kabel tumando lugá.
Sentral di Polis a tuma kontakto ku Warda di polis Montaña ku mesora a drenta akshon i ora ku e patruyanan a yega, nan a tuma nota ku e momentu ei tabatin kimamentu di kabel i ainda tin un gran kantidat di kabel ku no a keda kimá.
Esaki a kondusí na detenshon di dos sospechoso i esaki a sosodé den kareda di kuartu pa ocho di mainta. Ta trata di hende hòmbernan di inisial H.S.H. di 47 aña di edat i A.R.J. di 49 aña di edat, ámbos nase na Kòrsou.
Nan a keda detené pa ladronisia i inkubrimentu. E detenshon a tuma lugá na un kas den Kaya Duvert “Boy” Nicolina.
Manera menshoná na e adrès a enkontrá vários waya ku ta prosedente di ladronisia di kompanianan ku ta suministrá koriente i señalnan di internèt, televishon pa komunidat.
Bosero di polis a splika Extra ku momentu di investigashon, polis a tuma kontakto ku e kompanianan Aqualectra, Flow i Digicel, ku ta kompanianan ku regularmente ta bira víktima di ladronisia di kabel, ku a manda nan representantenan pa tuma nota di un ke otro.
Bosero di polis a indiká ku e representantenan ku a presentá na e sitio i a rekonosé nan kabelnan.
Polis a realisá na mes momentu un entrada hudisial i a konfiská tur e kabelnan ku ainda no a keda kimá i tambe e kopernan.
Tabatin un aspekto ku a hala atenshon, esta ku un di e sospechosonan tabatin un T-shirt di un kontratista bistí. Bosero di polis a duna di konosé ku investigashon lo mester determiná si enbèrdat e persona ta traha pa e kontratista òf nò.
Despues di 6 ora di interogashon a presentá e sospechosonan dilanti di un fiskal ouksiliar ku a ordená nan enkarselashon pendiente di mas investigashon.
