Riba djadumingu 3 di sèptèmber ta organisá e dia habrí anual na Christoffelpark. Ta selebrá e dia aki pa añanan kaba huntu ku e bario di Savonet. E plantashi di Savonet, te dia di awe, ta masha importante pa e abitantenan di Savonet.
Ercandace Cijntje, assistent manager na Christoffelpark i habitante di Savonet a bai buska e kuentanan bieu di e abitantenan di bario, ku a tende e kuentanan aki di nan welanan tokante e bida i trabou ántes na e plantashi i den besindario.
Memorianan di Bubuchi Doran
Un di e kuentanan aki ta bini di e habitante di besindario Fransisco ‘Bubuchi’Doran. Tokante di e memorianan di Bubuchi di tempu ku e tabata mucha na Savonet a skibi un relato yamá: ‘Historia di Plantashi Sabaneta segun Francisco ‘Bubuchi’ Doran. Den e relato e ta deskribí kon mucha despues di kome mèrdia tabata bai hunga pafó pa buska hende mas grandi di edat di den bario ku na kas tabata sinta riba saku di ariña, i tabata konta e muchanan kuenta di ‘Nanzi’ (folklóriko) i relato tokante e pasado di sklabitut. Segun Bubuchi tabata asina ku, si e muchanan no tabata gusta e kuentanan di esun kas mashá, nan tabata kore bai e siguiente kas te ora ku nan haña un kuenta bon.
E shonnan di Savonet
Tokante e diferente doñonan (shon) di Plantashi Savonet tambe tin relato konosí. Manera por ehèmpel di Shon Welmu i Shon Harrie. Habitante di bario Ruben Sambo ta konta di shon Welmu ku e tabata un hòmber simpátiko, miéntras ku den bario tabata haña shon Harrie ònbeskòp. Ruben ta kòrda Shon Harrie di tempu ku Ruben mes tabata mucha. Segun e, e tabatin hopi muhé i ‘si e no tabata gusta bo e tabata drenta bo kas, hisa tapadera di e weanan riba kandela i skupi den e kuminda!’
Tradishon: ‘Batimentu di huda’
E bario di Savonet konosé su propio tradishonnan. Asina ántes tabata organisá un fiesta ku tabata yama ‘batimentu di Huda’, un fiesta kaminda tabata kana kanta den kayanan, i bati un pòpchi yamá Huda ku palu miéntras tabata manda tur sorto di maldishon p’e. Antonilia (Tonia) Wiel-Lourens tabata traha e pòpchinan aki na Savonet. Tabata bisti e pòpchi un flus bieu yena ku sobra di tela bieu ku tabata fia serka un hende den e pueblo. Durante di e fiesta tabata lastra e pòpchi aki den kaya i despues kolog’é den un palu di tamarein grandi.
E anochi ku tabata sigui riba e batimentu di Huda tabata un fiesta grandi ku bibida, baile i muzik. E yu hòmber di Tonia (Angel Wiel, nasé na 1921) ta konta kon un dia durante e fiesta un hòmber a kana pasa i el a kere ku e pòpchi den e palu tabata un spiritu. E no tabata na altura di e tradishon i el a kuminsá tosa masha duru i eksaherá pasobra e tempu ei hende tabata pensa ku spiritu ta kore bai ora hende tosa!
Historia di Plantashi Savonet
Plantashi Savonet ta un di e plantashinan di mas bieu i mas bon manehá na Kòrsou i ku 1500 hèktar tambe ta e plantashi di mas grandi di e isla. Na 1660 e vise direktor di e Islanan Abou e tempu ei, Mathias Heck, a athudiká e tereno na Willem Beck, ku tabata su ruman tambe (pa kasualidat).
Den e tempu ei tabata kria desena di tipo di bèrdura i fruta i otro kultivo. E kultivo di mas importante na Plantashi Savonet tabata maishi chikí (Sorghum). Pero tabata Mathias van der Dijs ku berdaderamente a laga e plantashi bona despues ku el a tum’é ofer. El a kumpra Savonet na 1815 i 15 aña despues el a kumpra e plantashi Sorgvliet ku tabata serka ei banda.
Algun aña despues di su morto su yu muhé a bende e plantashi ku Jacob van der Linde-Schotborg na 1863. Na 1965 outoridatnan di Kòrsou a kumpra Savonet ku sèn di gobièrnu hulandes bou di kondishon ku e lo bira un reservashon di naturalesa. Na 1972 a duna e área na e fundashon Stinapa (despues CARMABI) pa maneh’é. E parke ku awor ta konosí komo Christoffel National Park a habri komo parke nashonal pa públiko na 1978.
Fiesta di kosecha Seú
Na plantashi Savonet tambe tabata selebrá Seú, e fiesta di kosecha. Hende muhé tabata balia ku makutu yen di produkto di agrikultura riba nan kabes miéntras ku hòmber tabata toka muzik ku chapi, tambú i kachu. E marcha aki nan tabata hasi den e vèltnan i asina nan tabata hiba e kosecha pa e mangasinanan.
Dia di Sabaneta
Pa motibu di e historia largu huntu, Parke Christoffel tur aña huntu ku e abitantenan di Savonet ta selebrá ‘Dia di Sabaneta’. Riba e dia aki ta duna atenshon na e historia, kultura i naturalesa den e bario di Savonet. Ademas Parke Christoffel riba e mesun ei dia ta selebrá e Dia Habri di tur aña.
E aña aki tambe gustosamente nos ta invitá tur hende pa riba 3 di sèptèmber bishitá e parke grátis. Entre 6 or di meinta i 10 or di meinta por subi e seru Christoffel grátis, entre 8 or di meinta i 2 or di atardi por bishita e museo Savonet grátis i entre 9 or di meinta i 7 or di atardi tin stènt di bende kos ku por bishitá ku un atmósfera festivo. Gana di baila? Grupo Kòmpèr, Hóben na Timon i Típiko San Mango tur lo tei e aña aki pa entretené tur hende. Bini ku henter famia. Tambe pa mucha lo organisá diferente aktividat henter dia.