Premier Pisas: No tin krísis di dengue pero tuma situashon na serio
WILLEMSTAD.-Gobièrnu di Kòrsou pa medio di premier i alabes minister di GMN sr. Pisas, huntu ku funshonarionan di Salubridat a duna informashon riba e situashon ku Kòrsou ta eksperensiando pa loke ta trata e malesa dengue. E siman aki a sali informashon ku 3 persona relativamente a muri den hospital na dengue, miéntras ku tin vários kaso serio.
Melissa Arias di e departamentu di Salubridat a splika ku ta importante pa hinter komunidat drenta den guera kontra e malesa dengue awor aki. E profeshonal ta enfatisá ku Kòrsou no ta den estado di krísis, pero mester hasi tur loke ta posibel pa evitá ku e sangura ta haña kaminda pa brui i asina pa sanguranan pika mas hende. Ta ku yudansa di hinter komunidat lo por logra dominá dengue den e pais aki.
Timnan di GMN lo bishita kasnan i hinter besindario, tambe lo bai serka hendenan ku probablemente tin dengue pa elimina tur foko unda sangura por brui. Tambe e timnan lo bishita sitionan komersial unda lo informa empresarionan i yuda elimina sitionan ku e sangura por usa pa brui. Ademas lo bishitanan áreanan turístiko. No ta e intenshon pa spanta turistanan, pero si pa informa nan kon pa protehá nan mes mihó. Hopi turista no ta kustumbrá ku malesanan tropikal manera esaki.
Mas aleu el a duna di konosé ku gobièrnu ta bai organisá akshonnan pa haña sa unda mester hasi limpiesa mas rigoroso i asina elimina posibel luganan unda sangura por brui. Huntu ku gruponan di boluntario ta bai hasi limpiesa, mientrastantu gobièrnu ta sigui monitor e sifranan.
Dr. Arias a bisa ku for di komunidat ta puntra dikon no ta flit mas manera ántes. Riba esaki el a kontestá ku ora flit e huma ta mata solamente e sangura adulto, pues e produkto no tin niun efekto riba e larva ku otro palabra dentro di algun dia tin yen sangura nobo atrobe. Ademas e produkto ta mata tambe maribomba, abeha i asta paranan i kada un tin nan ròl den e ekosistema. Pa hendenan ku sinti doló di kurpa, doló tras di wowo etc pa nan bai dòkter. Tin 4 tipo di dengue anto e situashon por ta asta mas peligroso den kaso serka hende ku a haña dengue kaba.
Importante ta pa kuida spesialmente hende grandi i mucha chikitu.
Minister di GMN sr. Pisas a hasi un apelashon pa tuma e atvertensia na serio.
