QUITO, AP.- Ecuador ta buskando e mediashon di un pais òf personahe internashonal pa haña un salida pa e kaso di e fundadó di WikiLeaks, Julian Assange. Assange tin asilo desde mas di sinku aña aden e embahada aki na London.
Den e konferensia di prensa ku koresponsalnan, e kansier Maria Fernanda Espinosa a afirmá ku “ningun di e kasonan na nivel mundial riba tema di asilo a wòrdu resolvé sin koperashon di paisnan involukrá i tin biaha ku mediashon di un terser pais”.
Assange a tuma asilo den e mishon diplomátiko ekuatoriano den yüni 2012 pa evadí un pedido di ekstradishon na Suesia pa rospondé na akusashonnan di delitonan seksual, ku el a ninga. Den novèmber, e fiskal sueko a sera e proseso den su kontra pero Assange no por bandoná e sede diplomátiko debí ku outoridat britániko tin un òrdu di kaptura kontra di su persona.
“Nos ta buskando solushonnan, nos ta pensa ku e situashon di Julian Assange desde e punto di bista humano no ta sostenibel. Un persona no por biba den e kondishonnan aki pa semper i nos ta buskando un forma respetuoso ku Reino Uní pa haña un solushon”, asina Espinosa a ekspresá.
Te ainda, el a sostené ku Assange lo sigui benefisiá di e asilo i protekshon di e gobièrnu ekuatoriano.
Assange ta un eksperto oustraliano den informátika riba asuntunan polítiko interno i eksterno di vários pais, spesialmente den Merka, loke a motivá ku e sede diplomátiko ekuatoriano a kòrta e servisio di Internèt aña pasá pa evitá e konsekuensianan di tipo di akshonnan aki.
